विद्यापीठात 'प्रोफेसर ऑफ प्रॅक्टिस; पदे भरणार; कुलगुरू डाॅ. फुलारी यांची माहिती
डॉ. बाबासाहेब आंबेडकर मराठवाडा विद्यापीठात पर्यावरणशास्त्र विभाग प्रमुख म्हणून कार्यरत असलेले डॉ. नरसिंगराव नारायणस्वामी बंदेला २२ वर्षांच्या सेवेनंतर निवृत्त झाले. त्यानिमित्त त्यांना सन्मानित करण्यासाठी विद्यापीठाकडून सेवा गौरव समारंभ कार्यक्रमाचे आयोजन करण्यात आले.
eduvarta@gmail.com 
एज्युवार्ता न्यूज नेटवर्क
अनुभवी व ज्ञानी लोकांवर विद्यापीठाचे विभाग ओळखले जात असतात म्हणूनच विविध विषयात अध्यापन व संशोधनात योगदान देणाऱ्या प्राध्यापकांमध्ये 'प्रोफेसर ऑफ प्रॅक्टिस' (Professor of Practice) हे मानद पद भरण्यात येईल, अशी माहिती कुलगुरू डॉ. विजय फुलारी (Vice Chancellor Dr. Vijay Phulari) यांनी दिली.
डॉ. बाबासाहेब आंबेडकर मराठवाडा विद्यापीठात (Dr. Babasaheb Ambedkar in Marathwada University) पर्यावरणशास्त्र विभाग प्रमुख म्हणून कार्यरत असलेले डॉ. नरसिंगराव नारायणस्वामी बंदेला २२ वर्षांच्या सेवेनंतर निवृत्त झाले. त्यानिमित्त त्यांना सन्मानित करण्यासाठी विद्यापीठाकडून सेवा गौरव समारंभ कार्यक्रमाचे आयोजन करण्यात आले. या सन्मान सोहळ्यात डाॅ. फुलारी बोलत होते. यावेळी कुलगुरू डॉ. फुलारी यांच्यासह प्र-कुलगुरू डॉ. वाल्मीक सरवदे, कुलसचिव डॉ. प्रशांत अमृतकर, सामान्य प्रशासन विभागप्रमुख डॉ. कैलास पाथ्रीकर यांच्यासह आदींची उपस्थिती होती.
कुलगुरू डॉ. फुलारी म्हणाले, आपल्या विद्यापीठाला मोठी परंपरा आहे. अनुभवी व ज्ञानी माणसांचे योगदान पुढील काळातही मिळावे म्हणून 'प्रोफेसर ऑफ प्रॅक्टिस' या मानद पदावर प्राध्यापकांची नियुक्ती देण्यात येईल, असेही त्यांनी स्पष्ट केले.
विद्यापीठाने मला खूप काही दिले, समाधानाने निवृत्त होत आहे, असे डॉ. बंदेला म्हणाले. डॉ. बदेला यांनी नॅक, मनुष्यबळ विकास केंद्र, पर्यावरणशास्त्र विभागास मोठे योगदान दिल्याचे प्रास्ताविकात कुलसचिव डॉ. प्रशांत अमृतकर यांनी यावेळी सांगितले.
