लैंगिक शोषण रोखण्यासाठी विद्यापीठांमध्ये 'यूजीसी'चे १५ दिवस जनजागृती अभियान 

एज्युवार्ता न्यूज नेटवर्क 

उच्च शिक्षण संस्थांमधील महिला कर्मचारी आणि विद्यार्थिनींचे लैंगिक शोषण रोखण्यासाठी (Preventing sexual abuse) विद्यापीठ अनुदान आयोगाकडून (युजीसी) २५ नोव्हेंबर ते १० डिसेंबर या १५ दिवसांचे विशेष जनजागृती अभियान (15-day public awareness campaign) राबविले जाणार आहे. आंतरराष्ट्रीय महिला हिंसाचार निर्मूलन दिनी २५ नोव्हेंबरपासून ते जागतिक मानवी हक्क दिन असलेल्या १० डिसेंबरपर्यंत हे अभियान देशभरातील विद्यापीठे आणि उच्च शिक्षण संस्थांमध्ये राबविले जाणार आहे. 

या अभियानात महिला आणि विद्यार्थिनींचे लैंगिक शोषण रोखणे, त्यांना लैंगिक अत्याचारांबाबत जाणीव करून देणे, तसेच तक्रार करण्याबाबत मार्गदर्शन केले जाणार आहे. या अभियानात महिलांसाठी आपत्कालीन क्रमांक (११२), महिलांसाठीची (१८१) आणि लहान मुलांसाठी (१०९८) हेल्पलाइन याबाबत जागरूकता निर्माण केली जाणार आहे. तसेच एखादी घटना घडल्यानंतर ती नोंदविणे, तक्रारपेटीतील तक्रारींच्या आधारे पोलिसांत तक्रार दाखल करण्यासाठी महिलांना मार्गदर्शन केले जाणार आहे. 

घरगुती हिंसाचार कायदा, पोक्सो कायदा, भारतीय न्याय संहिता (बीएनएस) आणि लैंगिक हिंसाचार कायद्यांबाबत जागरूकता निर्माण करण्यासाठी विविध उपक्रम राबवले जाणार आहेत. त्याचबरोबर लैंगिक समानता, संमती, चांगला-वाईट स्पर्श, सुदृढ नातेसंबंध, महिलांच्या सन्मानाची जपणूक आणि आदर याबाबत जाणीव, जागृती करण्यासाठी विविध कार्यशाळांचे आयोजन करण्याची सूचनाही युजीसीने विद्यापीठांना केली आहे.