विद्यार्थ्यांच्या आंदोलनाला यश! 25 ऑगस्टची परीक्षा अखेर पुढे ढकलली..

एज्युवार्ता न्यूज नेटवर्क 

आयबीपीएस परीक्षा (IBPS Exam) आणि एमपीएससीची राज्य सेवा संयुक्त पूर्व परीक्षा (MPSC State Services Joint Prelims Exam) एकाच दिवशी आल्याने एक परीक्षा पुढे ढकलण्यात यावी. या मागणीसाठी एमपीएससी (MPSC) परीक्षेची तयारी करणाऱ्या विद्यार्थ्यांचे मागील दोन दिवसांपासून पुण्यातील शास्त्री रोडवर आंदोलन (MPSC Students Protest Pune) सुरू आहे. त्यानंतर आयोगाच्या बैठकीमध्ये रविवार दि. 25 ऑगस्ट 2024 रोजी नियोजित महाराष्ट्र राजपत्रित नागरी सेवा संयुक्त पूर्व परीक्षा 2024 पुढे ढकलण्याचा निर्णय घेण्यात आला. परीक्षेचा दिनांक लवकरात लवकर जाहिर करण्यात येईल, असे ट्विट करत महाराष्ट्र लोकसेवा आयोगाकडून ही घोषणा करण्यात आली. त्यामुळे विद्यार्थ्यांच्या आंदोलनाला काहीसे यश मिळाले असे म्हणता येईल. 

परीक्षा पुढे ढकलण्यात आली आहे. मात्र, महाराष्ट्र लोकसेवा आयोगाने पुढे ढकलण्यात आलेल्या परिक्षेत कृषी विभागाच्या २५८ जागांचा देखील समावेश करावा. या २५८ जागांसाठी परिक्षा घेण्याचे नोटीफिकेशन काढावे अशी विद्यार्थ्यांची मागणी आहे. तोपर्यंत आंदोलन मागे न घेण्याचा विद्यार्थ्यांचा निर्णय आहे. कृषी विभागाच्या जागांबाबत जोपर्यंत निर्णय होत नाही तोपर्यंत आंदोलन सुरुच राहणार आहे, अशी विद्यार्थ्यांनी आपली भूमिका स्पष्ट केली आहे. त्यामुळे दोन मागण्यांपैकी एक मागणी मान्य झाली असली तरी दुसऱ्या मागणीसाठी हे आंदोलन सुरूच राहणार आहे. 

पुण्यात एमपीएससीच्या विद्यार्थ्यांनी पुकारलेल्या आंदोलनासंदर्भात विद्यार्थ्यांच्या हिताचा विचार करणे सरकारचे कर्तव्य आहे. परंतु सत्ताधारी याला गांभीर्याने घेताना दिसत नाहीत. उद्यापर्यंत यावर सरकारने योग्य भूमिका स्पष्ट केली नाही तर पुण्याच्या आंदोलनस्थळी मी स्वतः आंदोलनात सहभागी होऊन विद्यार्थ्यांना न्याय मिळवण्यासाठी मैदानात उतरेन, असा इशारा राष्ट्रवादीचे सर्वेसर्वा आणि माजी केंद्रीय मंत्री  शरद पवार यांनीही राज्य सरकारला इशारा दिला होता. मात्र, त्यापूर्वीच एमपीएससीने परीक्षा पुढे ढकलल्याने हा पेचप्रसंग टळला आहे.