BAMU NEWS : भरारी पथकाच्या धाडसत्रामुळे निकाल घसरला

एज्युवार्ता न्यूज नेटवर्क

डॉ. बाबासाहेब आंबेडकर मराठवाडा विद्यापीठातर्फे (Dr. Babasaheb Ambedkar Marathwada University) घेण्यात आलेल्या पदव्युत्तर अभ्यासक्रमांच्या परीक्षांमध्ये (Postgraduate course examination) कुलगुरूंसह इतर भरारी पथकांनी कॉपीमुक्तीसाठी धाडसत्र अवलंबिले होते. त्याचा परिणाम निकालांवर झाल्याचे समोर आले आहे. अनेक विषयांचा निकाल ५० टक्क्यांहून कमी, तर बहुतांश अभ्याक्रमांचे निकाल ७५ टक्क्यांहून कमी लागले असल्याची माहिती परीक्षा व मूल्यमापन मंडळाचे संचालक डॉ. बी. एन. डोळे (Director Dr. B. N. Dole) यांनी दिली.

विद्यापीठाचे कुलगुरू डॉ. विजय फुलारी यांनी मागील वर्षी पदव्युत्तर अभ्यासक्रमांच्या परीक्षेत विद्यापीठातील प्राध्यापकांची भरारी पथके नेमली होती. चारही जिल्ह्यांतील पदव्युत्तर अभ्यासक्रमांच्या परीक्षा केंद्रांना थेट कुलगुरू डॉ. फुलारी यांनी अचानकपणे भेटी देऊन कॉपी करणाऱ्या विद्यार्थ्यांचा संपूर्ण परीक्षा परफॉर्मन्स रद्द केला. अनुपस्थित प्राचार्यांना ५० हजार रुपये दंड ठोठावला. त्याचे परिणाम निकालात दिसून आले. विद्यापीठाने घेतलेल्या पदव्युत्तर अभ्यासक्रमांच्या परीक्षांचे निकाल जाहीर होण्यास सुरुवात झाली आहे. ७५ अभ्यासक्रमांचे निकाल जाहीर झाले.

या अभ्यासक्रमांचे निकाल घसरले

पदव्युत्तर अभ्यासक्रमांच्या जाहीर झालेल्या निकालात एम.ए. अर्थशास्त्र विषयाचा निकाल ५७.१४ टक्के लागला आहे. त्याशिवाय एम.ए. इंग्रजी ४९.६६ टक्के, भूगोल ६६.६७, इतिहास ५३.८५, गृहविज्ञान ६६.६७, मराठी ५३.३७. संगीत ६३.६४, मानसशास्त्र ६०, उर्दू ५८.३३, राज्यशास्त्र ६५.७१, एम.एस्सी बायोटेक्नॉलॉजी ६६.६७, बॉटनी ५६,०१, फॉरेन्सिक अॅप्लाइड फिजिक्स ॲण्ड बॅलिस्टिक्स, भौतिकशास्त्र ६९.२३, रसायनशास्त्र ९.८५, एम. कॉम ६३.०५, ई-कॉमर्स विषयाचा निकाल ६० टक्के लागला आहे. उर्वरित सर्व अभ्यासक्रमांचे निकाल घसरल्याची माहिती संचालक डॉ. डोळे यांनी दिली.