सहावीच्या मुलींकडून १०वीचे पेपर तपासणी प्रकरणात तक्रार करणाऱ्या विरोधात संस्थेकडून निलंबनाची कारवाई
उत्तरेश्वर हायस्कूल या शाळेतील वैभव शेंडे शिक्षक हे उत्तरपत्रिका तपासण्याचे काम करत असताना, सदर तपासणीसाठी 6 वीच्या मुलींची मदत घेत असल्याचा व्हिडीओ काढण्यात आला. तसेच तो व्हिडीओ मुख्याध्यापकांची कोणतीही पूर्वपरवानगी न घेता माध्यमांना पुरवण्यात आला. प्रत्यक्षात सदर शिक्षकाने संबंधित मुलींना मोकळ्या जागी रेषा मारण्याचे काम दिले होते.
eduvarta@gmail.com 
एज्युवार्ता न्यूज नेटवर्क
फलटण तालुक्यातील विडणी येथील उत्तरेश्वर हायस्कूलमध्ये (Uttareswar High School, Vidni) एका शिक्षकाने सहावीच्या विद्यार्थिनींच्या मदतीने दहावीचे पेपर तपासले (10th Class Paper Evaluation) जात होते. तो प्रकार समोर आणणाऱ्याच्या विरोधात आता कारवाईचा बडगा (Action Taken Against Peon) उगारण्यात आला आहे. माध्यमांना चुकीची माहिती देऊन शाळेची बदनामी केल्याचा ठपका ठेवत शिपाई मंगेश अभंग (Peon Mangesh Abhang) यांना निलंबित करण्यात आले आहे.
उत्तरेश्वर हायस्कूल या शाळेतील वैभव शेंडे शिक्षक हे उत्तरपत्रिका तपासण्याचे काम करत असताना, सदर तपासणीसाठी 6 वीच्या मुलींची मदत घेत असल्याचा व्हिडीओ काढण्यात आला. तसेच तो व्हिडीओ मुख्याध्यापकांची कोणतीही पूर्वपरवानगी न घेता माध्यमांना पुरवण्यात आला. प्रत्यक्षात सदर शिक्षकाने संबंधित मुलींना मोकळ्या जागी रेषा मारण्याचे काम दिले होते. त्यामुळे तुम्ही माध्यमांना दिशाभूल करणारी माहिती दिली. त्यानुसार आपल्यावर चार महिने निलंबनाची कारवाई करण्यात येत आहे, असे शिपायाला पाठवण्यात आलेल्या पत्रात नमूद करण्यात आले आहे.
"२६ फेब्रुवारी रोजी मराठीचा पेपर हा सहावीच्या विद्यार्थिनींकडून तपासण्यात आला येत होता. हा प्रकार सलग दोन दिवस सुरू होता. याबाबत मी संस्थेच्या सचिवांना माहिती दिली त्यामुळे मला संबंधित दमदाटी केली. त्यानंतर मी शिक्षणाधिकाऱ्यांकडे या प्रकारणी तक्रार केली. त्यावर मला संस्थेने कारणे दाखवा नोटीस बजावली. संस्थेतील सीसीटीव्ही तुम्ही सार्वजनिक केले, असे सांगत मला नोटीस बजावण्यात आली. यामध्ये माझ्याकडून संस्थेची बदनामी केल्याचा ठपका ठेवण्यात आला," अशी माहिती शिपाई अभंग यांनी दिलीय.
"ज्या शिक्षकाने हे सर्व केले त्याच्याविरोधात कोणतीही कारवाई करण्यात आली नाही. मात्र, माझ्यावर कारवाई करण्यात आली. संस्थेच्या सचिवांचा मुलगा दहावीत आहे, त्याला मदत करण्यासंबंधी शिक्षकाकडून काहीतरी भूमिका घेतली गेली असावी, म्हणून त्याच्यावर कारवाई न करता आपल्यावर कारवाई करण्यात आली असेल," अशी तीव्र प्रतिक्रिया शिपाई मंगेश अभंग यांनी कारवाईनंतर दिली आहे.
