आरोग्य विज्ञान विद्यापीठ : पदवी, पदव्युत्तर अभ्यासक्रमाच्या परीक्षांना 23 मार्चपासून सुरूवात

एज्युवार्ता न्यूज नेटवर्क

महाराष्ट्र आरोग्य विज्ञान विद्यापीठ (MUHS)आणि संलग्न महाविद्यालयातील विविध अभ्यासक्रमाच्या पदवी, पदव्युत्तर अभ्यासक्रमांच्या (Undergraduate and Postgraduate Courses) लेखी परीक्षांना २३ मार्चपासून सुरुवात (Exams begin on March 2) होत आहे. या परीक्षा १० एप्रिल २०२६ पर्यंत चालणार आहेत. राज्यभरातील एकूण १७५ परीक्षा केंद्रांवर (175 Examination Centre) होणाऱ्या या परीक्षेला सुमारे ४३ हजार ९२८ विद्यार्थी बसणार असल्याची माहिती आरोग्य विद्यापीठाकडून देण्यात आली. सकाळी ९ आणि दुपारी २ अशा दोन सत्रात या परीक्षा घेण्यात येणार आहेत. 

पदवी स्तरावर वैद्यकीय अभ्यासक्रमाच्या (एमबीबीएस) प्रथम ते चतुर्थ वर्षांच्या विविध सत्रांच्या परीक्षांबरोबरच बीएएमएस, बीयूएमएस आणि बीएचएमएस या आयुष अभ्यासक्रमांच्या विविध वर्षांच्या परीक्षा, तसेच बीएससी नर्सिंगच्या प्रथम सत्राच्या परीक्षांना सुरुवात होत आहे. तसेच पदव्युत्तर स्तरावर आयुर्वेद आणि युनानी शाखेतील एमडी आणि एमएसच्या अंतिम वर्षांच्या परीक्षा होणार आहेत. विद्यापीठाशी संलग्न असलेल्या इतर अभ्यासक्रमांच्या परीक्षाही घेतल्या जाणार आहेत.

महाराष्ट्र आरोग्य विज्ञान विद्यापीठाने परीक्षा प्रक्रिया अधिक सुरक्षित, पारदर्शक आणि वेळेत पूर्ण व्हावी, यासाठी ऑनलाइन प्रणालीचा वापर कायम ठेवला आहे. या प्रणालीद्वारे प्रश्नपत्रिका परीक्षेच्या दिवशी थेट संबंधित केंद्रांवर पाठविण्यात येणार आहेत. तसेच उत्तरपत्रिकांचे स्कॅनिंग करून त्यांची तपासणी करण्याची पद्धतही यापूर्वीप्रमाणेच राबविण्यात येणार आहे. यामुळे परीक्षा व्यवस्थापन अधिक सुलभ आणि विश्वासार्ह होत असल्याचे महाराष्ट्र आरोग्य विज्ञान विद्यापीठाचे परीक्षा नियंत्रक डॉ. संदीप कडू यांनी स्पष्ट केले आहे.