लवकरच अनुसूचित जमाती आयोगाची स्थापना करणार; आदिवासी मंत्र्यांची घोषणा 

एज्युवार्ता न्यूज नेटवर्क 

आदिवासी तरुणांच्या हिताच्या दृष्टीने महाराष्ट्रात सर्व परवानग्या घेऊन लवकरच अनुसूचित जमाती आयोगाची स्थापना (Establishment of the Scheduled Tribes Commission) करण्यात येणार असल्याची माहिती आदिवासी विकास मंत्री डॉ. अशोक उईके (Dr. Ashok Uike) यांनी पत्रकार परिषदेत दिली. आदिवासी विकास मंत्रीपद स्वीकारल्यानंतर डॉ. उईके यांनी प्रथमच नाशिकला येऊन आदिवासी आयुक्तालयातील अधिकाऱ्यांसमवेत आढावा बैठक घेतल्यानंतर पत्रकारांशी संवाद साधला. यावेळी त्यांनी विविध विषयांवर भाष्य केले. 

राज्यातील सर्व २६ आदिवासी आमदार आणि मंत्री मिळून आदिवासी बांधवांचे हित साधले जाण्याला प्राधान्य देणार असल्याचे यावेळी डॉ. उईके यांनी सांगितले. आदिवासी विकास विभागाच्या वतीने मुलींसाठी अधिकाधिक शासकीय वसतिगृहांची उभारणी करण्याचे नियोजन करण्यात येणार आहे. तसेच आदिवासी विभागाच्या माध्यमातून अधिकाधिक शासकीय वसतिगृहांचे बांधकाम करून स्वतःची वसतिगृहे निर्माण करण्यात येणार असल्याचे ते म्हणाले. 

प्रत्येक आश्रमशाळा, वसतिगृहात अधिकाधिक सुविधा उपलब्ध करून देण्यात येणार आहेत. तसेच मुलींच्या वसतिगृहाला महिला अधिकाऱ्यांना दत्तक देऊन त्यांच्याकडे पूर्ण जबाबदारी सोपविण्यात येणार असल्याचे डॉ. उईके म्हणाले. यावेळी मंत्री नरहरी झिरवळ, आदिवासी आयुक्त नयना गुंडे यांच्यासह आदिवासी मंत्री व आमदार उपस्थित होते. 
________________________________

आदिवासी विकास विभागाचे काम चांगल्या पद्धतीने सुरू आहे. या विभागाचे कार्य क्षेत्र मोठे आहे. प्रकल्प अधिकारी यांनी आदिवासी बांधवांचे जीवनमान उंचावण्यासाठी प्रयत्न करावेत. विद्यार्थ्यांना आवश्यक सोयी-सुविधा उपलब्ध करून द्याव्यात. शैक्षणिक गुणवत्ता वाढीसाठी सांघिक प्रयत्न व्हावेत. 

नरहरी झिरवळ, अन्न व औषध प्रशासन मंत्री