NEET परीक्षेचा निकाल पुन्हा जाहीर होणार ; 4 लाख विद्यार्थ्यांवर परिणाम

एज्युवार्ता न्यूज नेटवर्क 

नॅशनल एलिजिबिलिटी कम एन्ट्रन्स टेस्ट (NEET UG) 2024 परीक्षेसंदर्भात झालेल्या सुनावणीत सर्वोच्च न्यायालयाने पुन्हा परीक्षा न घेण्याचा म्हत्वपूर्ण निर्णय घेतला. मात्र,सुनावणी दरम्यान न्यायालयाने नॅशनल टेस्टिंग एजन्सी (NTA) ला नीट परीक्षेचा निकाल पुन्हा जाहीर (Result of NEET exam declared again)करण्यास सांगितले. निकाल पुन्हा जाहीर झाल्याने 4 लाख विद्यार्थ्यांच्या मार्किंगमध्ये बदल होणार आहे.

सर्वोच्च न्यायालयाने आपल्या निर्णयात क्वांटम फिजिक्सच्या प्रश्नाचा पर्याय 4 बरोबर ठरवला आणि नॅशनल टेस्टिंग एजन्सी (NTA) ला पुन्हा निकाल जाहीर करण्यास सांगितले. त्याआधी सोमवारी झालेल्या सुनावणी दरम्यान, सर्वोच्च न्यायालयाच्या खंडपीठाने मंगळवारपर्यंत प्रश्न क्रमांक 19 च्या योग्य उत्तरावर एनटीएचे उत्तर सादर करण्याचे आदेश दिले होते. या प्रश्नाबाबत सर्वोच्च न्यायालयाला आयटीआय दिल्लीने स्थापन केलेल्या तीन लोकांचा अहवाल प्राप्त झाला होता. ज्यामध्ये प्रश्नाचे चौथ्या क्रमांकाचे उत्तर योग्य मानले गेले होते. आता याबाबत CJI ने NTA ला पुन्हा निकाल जाहीर करण्यास सांगितले आहे. एका प्रश्नाच्या दोन उत्तरांसाठी पूर्ण गुण देण्याच्या एनटीएच्या निर्णयावर सर्वोच्च न्यायालयाने आक्षेप नोंदवला होता.

देशाचे सरन्यायाधीश डी.वाय. चंद्रचूड, न्यायमूर्ती जे. बी. पार्डीवाला आणि मनोज मिश्रा यांच्या खंडपीठाने सोमवारी आणि मंगळवारी या संदर्भातील सुनावणी पूर्ण केली. सुनावणीनंतर सर्वोच्च न्यायालयाच्या खंडपीठाने पुन्हा परीक्षा घेण्यास नकार दिला. निकाल देताना सर्वोच्च न्यायालयाने म्हटले आहे की, देशभरातील पेपरफुटीच्या ठोस पुराव्याअभावी पुन्हा परीक्षा घेतल्यास त्याचे परिणाम सर्व २ 3 लाख विद्यार्थ्यांना भोगावे लागतील, त्यामुळे परीक्षा पुन्हा घेता येणार नाही.