सावित्रीबाई फुले पुणे विद्यापीठात प्राध्यापक पदांसाठी भरती सुरू

एज्युवार्ता न्यूज नेटवर्क

सावित्रीबाई फुले पुणे विद्यापीठाने (Savitribai Phule Pune University) करार पद्धतीवर सहायक प्राध्यापकांची भरती प्रक्रिया जाहीर (Recruitment process for assistant professors begins) केली आहे. त्यासाठी इच्छुक आणि पात्र उमेदवारांकडून आज ४ सप्टेंबर गुरुवारपासून अर्ज प्रक्रिया सुरू करण्यात आली आहे. उमेदवारांना अर्ज सादर करण्यासाठी १३ सप्टेंबरपर्यंत मुदत (Deadline until September 13th) देण्यात आली आहे. निवड झालेल्या उमेदवारांना प्रतिमहिना ४० हजार रुपये मानधन मिळणार असून ही नेमणूक ३१ मे २०२६ पर्यंत ग्राह्य धरली जाणार आहे, असे विद्यापीठ प्रशासनाकडून स्पष्ट करण्यात आले आहे.

NIRF रँकिंगमध्ये डॉ. डी. वाय. पाटील विद्यापीठ डेन्टल विभागात देशात चौथ्या क्रमांकावर

या भरती मोहिमेअंतर्गत एकूण ५२ पदे भरण्यात येणार आहेत. त्यामध्ये विविध प्रवर्गनिहाय आरक्षणाचा विचार केला जाणार आहे. एससी प्रवर्गासाठी २ जागा असून त्यातील एक सर्वसाधारण आणि एक महिला उमेदवारासाठी आहे. एसटी प्रवर्गातील ६ जागांपैकी ४ जागा सर्वसाधारण तर २ महिला उमेदवारांसाठी आहेत. डीटी-ए गटात ३ जागा असून, २ सर्वसाधारण आणि १ महिला उमेदवारासाठी राखीव आहे. एनटी-बीमध्ये २ जागा, एनटी-सीमध्ये १ जागा, एनटी-डीमध्ये ३ जागा असून त्यात २ सर्वसाधारण व १ महिला उमेदवारासाठी आहे. एसबीसी प्रवर्गात १ जागा उपलब्ध आहे.

ओबीसी प्रवर्गासाठी एकूण ८ जागा असून, त्यापैकी ६ सर्वसाधारण तर २ महिला उमेदवारांसाठी आहेत. एसईबीसी व ईडब्ल्यूएस या दोन्ही प्रवर्गांत प्रत्येकी १२ जागा असून त्यात ७ सर्वसाधारण, ४ महिला आणि १ क्रीडा व्यक्ती यांच्यासाठी राखीव आहेत. खुल्या गटासाठी २ जागा असून, त्यात १ सर्वसाधारण आणि १ महिला उमेदवारासाठी आहे. सर्व विषयनिहाय माहिती व अटी विद्यापीठाच्या संकेतस्थळावर उपलब्ध करून देण्यात आल्या आहेत. इच्छुक उमेदवारांनी दिलेल्या मुदतीत अर्ज दाखल करण्याचे आवाहन विद्यापीठ प्रशासनाने केले आहे.