एमपीएससी : पोलीस उपनिरीक्षक मुख्य परीक्षेचा निकाल जाहीर, अतिश मोरे राज्यात पहिला

एज्युवार्ता न्यूज नेटवर्क 

महाराष्ट्र लोकसेवा आयोगाकडून (MPSC) 'महाराष्ट्र अराजपत्रित गट ब सेवा मुख्य परीक्षा २०२३' (Maharashtra Non-Gazetted Group B Services Main Exam 2023) पोलीस उपनिरीक्षक (PSI) पदाच्या परीक्षेचा निकाल प्रसिद्ध (Exam results announced) करण्यात आला आहे. या निकालाची तात्पुरती सर्वसाधारण गुणवत्ता यादी (Provisional temporary Merit List published) आयोगाच्या संकेतस्थळावर प्रसिध्द करण्यात आली आहे. मागील काही दिवसांपासून परीक्षार्थी या निकालाची चतुरतेने  वाट पाहत होते. अखेर महाराष्ट्र लोकसेवा आयोगाने पीएसआय मुख्य परीक्षेचा निकाल जाहीर केला आहे. अतिश शिवाजी मोरे (Athish More First Rank) या विद्यार्थ्याने ३१८ गुण मिळवित राज्यात प्रथम क्रमांक पटकावला आहे. 

आयोगाकडून प्रसिद्ध करण्यात आलेल्या या निकाल यादीत १४ विद्यार्थ्यांना ३०० पेक्षा अधिक गुण मिळाले आहेत. यामध्ये अतिश शिवाजी मोरे, चेतन राठोड, भीमसिंग ब्रह्मनवत, वैभव सांगळे, बजरंग भस्के या विद्यार्थ्यांने अनुक्रमे एक ते पाचवे स्थान पटकावले आहे. एकूण २१८ विद्यार्थ्यांची नावे या निकालात आहेत. राज्यात प्रथम आलेला अतिश शिवाजी मोरे हा विद्यार्थी आर्थिक दुर्बल घटक प्रवर्गातून येतो.

एमपीएससीने प्रसिद्धिपत्रकाद्वारे माहिती दिली आहे की, एमपीएससीकडून पीएसआय संवर्गातील ३७४ पदांसाठी ५ नोव्‍हेंबर २०२३ रोजी परीक्षा घेतली होती. एमपीएससीने सर्वसाधारण गुणवत्ता यादी नुकतीच संकेतस्थळावर जाहीर केली आहे. सर्वसाधारण गुणवत्ता यादी उमेदवारांच्‍या अर्जामधील विविध दाव्‍यांच्‍या अनुषंगाने तयार करण्यात आली आहे. अंतिम निकालापूर्वी पडताळणी केल्‍यानंतर काही उमेदवारांच्‍या शिफारशींमध्ये बदल होऊ शकतो. खेळाडू व अनाथ प्रवर्गातून अर्ज सादर केलेल्‍या उमेदवारांची प्रमाणपत्र प्राधिकृत अधिकाऱ्यांकडून पडताळणीच्‍या अधीन राहून त्‍यांचा प्रवर्गाचा दावा तात्‍पुरता ग्राह्य धरण्यात आला आहे. त्‍यानुसार सर्वसाधारण गुणवत्ता यादीमध्ये समावेश करण्यात आला आहे, अशी माहिती आयोगाकडून देण्यात आली आहे.