आरटीई प्रवेशासाठी केवळ 49 हजार जागा; शाळांची संख्या वाढणार का?

एज्युवार्ता न्यूज नेटवर्क 

शिक्षण हक्क कायद्यांतर्गत (आरटीई) 2025-26 या शैक्षणिक वर्षासाठी 25 टक्के राखीव जागांसाठीच्या प्रवेशासाठी ऑनलाईन प्रवेश प्रक्रिया सुरू झाली आहे. (RTE Admission Process 2025-26) प्रवेशासाठी शाळांची नोंदणी सुरू झाली असून त्यासाठी मंगळवार अखेर केवळ 3 हजार 698 शाळांनी नोंदणी (Registration of 3 thousand 657 schools) केली आहे. आत्तापर्यंत नोंद केलेल्या शाळांमध्ये केवळ 49 हजार 238 जागा उपलब्ध आहेत. 31 डिसेंबर ही शाळा नोंदणीसाठी अंतिम मुदत (December 31st school registration deadline) असताना मागील वर्षाच्या तुलनेत फक्त 30 ते 35 टक्के शाळांनी नोंदणी केली आहे. त्यामुळे यावर्षी हजारो विद्यार्थी आरटीई प्रवेशापासून वंचित राहण्याची भीती पालकांमध्ये निर्माण झाली आहे. 

2025-26 या शैक्षणिक वर्षात राज्यातील 9 हजार 138 इंग्रजी माध्यमाच्या शाळांनी नोंदणी केली होती. त्यानुसार 1 लाख 2  हजार 434 जागा उपलब्ध झाल्या होत्या. यंदा मात्र आरटीई प्रवेश प्रक्रियेसाठी शाळा नोंदणीपासून संस्थाचालकांमध्ये उदासीनता दिसून येत आहे. शाळा नोंदणीची एकूण संख्या पाहता त्यासाठी मुदतवाढ दिली जाण्याची शक्यता आहे. मंगळवारी सायंकाळपर्यंत किती शाळा नोंदणी करतात हे पाहणे महत्त्वाचे ठरणार आहे. 

या शाळांमधील विद्यार्थी नोंदणी प्रक्रिया जानेवारीच्या दुसऱ्या आठवड्यात सुरू करण्याचे शिक्षण विभागाचे नियोजन आहे.आर्थिक दुर्बल, वंचित घटकांतील विद्यार्थ्यांना आरटीईअंतर्गत खासगी शाळांतील २५ टक्के राखीव जागांवर प्रवेश देण्यात येतो. गेल्यावर्षी शालेय शिक्षण विभागाने या प्रवेश प्रक्रियेत केलेल्या बदलामुळे हे प्रकरण न्यायालयात गेले. त्यानंतर या प्रक्रियेला विलंब होऊन ऑक्टोबरपर्यंत प्रवेश फेऱ्या राबविण्यात आल्या.

पुढील शैक्षणिक वर्षांसाठी आरटीईच्या 25 टक्के राखीव प्रवेश प्रक्रिये अंतर्गत पात्र शाळांची पडताळणी 18 डिसेंबरपासून सुरू करण्यात आली आहे. त्यानुसार शाळांनी आवश्यक सर्व माहिती अचूक असल्याची खात्री करूनच संकेतस्थळावर अद्ययावत करावी. तसेच शाळांसाठी दिलेल्या वेळेत नोंदणी प्रक्रिया पूर्ण करण्याच्या सूचना प्राथमिक शिक्षण संचालनालयाने दिल्या आहेत.

31 डिसेंबर शाळा नोंदणीसाठी शेवटचा दिवस 

आरटीईअंतर्गत शाळा नोंदणीसाठी शाळांना ३१ डिसेंबरपर्यंतची मुदत देण्यात आली आहे. तर विद्यार्थी नोंदणीची प्रक्रिया जानेवारीच्या दुसर्‍या आठवड्यात सुरू करण्याचे नियोजन आहे. प्रवेश प्रक्रिया वेळेत पूर्ण करण्यासह अधिकाधिक विद्यार्थ्यांना प्रवेशाची संधी देण्याचा प्रयत्न आहे, अशी माहिती प्राथमिक शिक्षण संचालनालयाकडून देण्यात आली आहे.