नवोदय विद्यालयात इयत्ता 6 वी च्या प्रवेशासाठी अर्ज सुरू, 'या' तारखेपर्यंत करा नोंदणी
केंद्रीय शिक्षण मंत्रालयाच्या नवोदय विद्यालय समितीने (NVS) 2025-26 या वर्षासाठी इयत्ता 6 वी च्या प्रवेशाचे वेळापत्रक जाहीर केले आहे. समितीने प्रसिद्ध केलेल्या अधिसूचनेनुसार, इयत्ता 6 वीच्या प्रवेशासाठी घेण्यात येणाऱ्या निवड चाचणीसाठी (JNVST) नोंदणी 16 सप्टेंबरपर्यंत करता येईल.
eduvarta@gmail.com 
एज्युवार्ता न्यूज नेटवर्क
नवोदय विद्यालयाच्या इयत्ता ६ वी मध्ये (Navodaya Vidyalaya Class 6 Admission) प्रवेश घेऊ इच्छिणाऱ्या पालकांसाठी मोठी आणि आनंदाची बातमी आहे. देशभरात जवाहर नवोदय विद्यालये (JNVs) चालवणाऱ्या केंद्रीय शिक्षण मंत्रालयाच्या नवोदय विद्यालय समितीने (NVS) 2025-26 या वर्षासाठी इयत्ता 6 वी च्या प्रवेशाचे वेळापत्रक जाहीर (Admission schedule announced) केले आहे. समितीने प्रसिद्ध केलेल्या अधिसूचनेनुसार, इयत्ता 6 वीच्या प्रवेशासाठी घेण्यात येणाऱ्या निवड चाचणीसाठी (JNVST) नोंदणी 16 सप्टेंबरपर्यंत करता येईल. त्यामुळे मागील काही दिवसांपासून प्रतीक्षेत असलेल्या पालकांना आता प्रवेश परीक्षा अर्ज भरता येणार आहे.
कुठे आणि कशी नोंदणी करावी?
ज्या पालकांना आपल्या पाल्याला जवाहर नवोदय विद्यालयात पुढील वर्षी सहाव्या वर्गात प्रवेश घ्यायचा आहे, ते प्रवेश परीक्षेचा अर्ज ऑनलाइन भरू शकतात. यासाठी पालकांना NVS च्या अधिकृत वेबसाईट navodaya.gov.in ला भेट द्यावी लागेल. वेबसाईटवर गेल्यानंतर तुम्हाला प्रथम रजिस्ट्रेशन करावे लागेल. आयडी आणि पासवर्ड याचा वापर करून लाॅग इन करा. यानंतर, पालक आवश्यक तपशील भरून आणि आवश्यक कागदपत्रांच्या सॉफ्ट कॉपी अपलोड करून नोंदणी करू शकतील. नोंदणी पुर्ण झाल्यानंतर सबमिट बटणावर क्लिक करून डाऊनलोड करा आणि प्रिंट काढा.
ही कागदपत्रे अपलोड करा
पालकांनी ऑनलाइन फॉर्म भरण्यापूर्वी अपलोड करावयाच्या कागदपत्रांची स्कॅन केलेली सॉफ्ट कॉपी जतन करून ठेवावी लागणार आहे. यामध्ये विद्यार्थ्याची स्वाक्षरी, पालकांची स्वाक्षरी, विद्यार्थ्याचा फोटो, पालक आणि विद्यार्थ्यांची स्वाक्षरी असलेले आणि शाळेच्या मुख्याध्यापकांनी प्रमाणित केलेले प्रमाणपत्र, आधार कार्ड (जर नसेल तर इतर कोणतेही वैध रहिवासी प्रमाणपत्र) या गोष्टींचा समावेश असावा.
