बारावी पास तरूणांना दरमहा ६ हजार रुपये ; मुख्यमंत्र्यांची पंढरपुरात घोषणा

एज्युवार्ता न्यूज नेटवर्क 

'मुख्यमंत्री माझी लाडकी बहीण योजने'नंतर आता एकनाथ शिंदे यांनी 'लाडका भाऊ योजना' (Ladka Bhau Scheme) लागू करण्याची घोषणा केली आहे. पंढरपूर येथे 'कृषी पंढरी' या कृषी प्रदर्शन उद्घाटन सोहळ्यात (Agricultural Exhibition Opening Ceremony) मुख्यमंत्र्यांनी ही घोषणा केली. या योजनेअंतर्गत १२ वी उत्तीर्ण तरूणांना दरमहा ६ हजार (6 thousand per month for 12th passed youth), डिप्लोमा केलेल्या तरूणांना ८ हजार तर पदवीधारक असलेल्या तरूणांना दरमहा १० हजार रुपये स्टायफंड देण्याची घोषणा मुख्यमंत्री एकनाथ शिंदे (CM Eknath Shinde) यांनी केली. 

आपण लाडकी बहीण योजना आणली तेव्हा काही लोकांनी आपल्यावर टीका केली. ते म्हणाले, लाडक्या बहिणीसाठी योजना आणलीत, आता लाडक्या भावांचे काय? मला त्यांना सांगायचे आहे की लाडक्या भावांकडेही आमचे लक्ष आहे. त्यामुळे आम्ही त्यांच्यासाठीही योजना आणली आहे. जो तरुण १२ वी उत्तीर्ण झाला आहे त्याला दरमहा सहा हजार रुपये, डिप्लोमा केलेल्या तरुणाला आठ हजार रुपये आणि पदवीधर तरुणाला १० हजार रुपये महिन्याला दिले जातील, असे मुख्यमंत्री म्हणाले. त्यामुळे राज्यातील लाखो तरूणांना या योजनेचा फायदा होणार आहे.  

हा तरुण वर्षभर एखाद्या कारखान्यात अप्रेन्टिसशिप (Apprenticeship) करेल, त्यानंतर तिथे त्याला कामाचा अनुभव मिळेल आणि त्या अनुभवाच्या जोरावर त्याला नोकरी देखील मिळेल. एक प्रकारे आपण स्कील्ड मॅनपावर (कुशल कामगार) तयार करत आहोत. राज्यसह देशातील उद्योग जगताला कुशल तरुण पुरवणार आहोत. आपले तरुण त्यांच्या कामात कुशल व्हावेत, यासाठी सरकार पैसे भरणार आहे, असे मुख्यमंत्री एकनाथ शिंदे म्हणाले.