सीईटीमुळे मुंबई विद्यापीठाचे वेळापत्रक कोलमडले, तारखांंमध्ये बदल करण्याची नामुष्की

एज्युवार्ता न्यूज नेटवर्क 

महाराष्ट्र राज्य सामायिक प्रवेश परीक्षा (Maharashtra State Common Entrance Test) कक्षाने आपल्या परीक्षांच्या तारखांमध्ये बदल केल्याने मुंबई विद्यापीठाने (Mumbai University) प्रसिद्ध केलेले उन्हाळी सत्र परीक्षांचे वेळापत्रक (Changes in the summer semester exam schedule) कोलमडले आहे. त्यामुळे विद्यापीठावर काही परीक्षांच्या तारखा बदलण्याची नामुष्की ओढावली.  एमबीए, एमएमएस, बी. एड., बी. पी. एड. आणि हॉटेल मॅनेजमेंट या व्यावसायिक अभ्यासक्रमांच्या प्रवेश परीक्षांच्या दिवशीच मुंबई विद्यापीठाच्या विविध अभ्यासक्रमांच्या परीक्षांचे पेपर घेतले (Mumbai University and CET exams on the same day) जाणार असल्याने विद्यार्थ्यांमध्ये गोंधळ निर्माण झाला होता. मात्र, मुंबई विद्यापीठाने याची वेळीच दखल घेत तातडीने या परीक्षांचे वेळापत्रकात बदल करून विद्यार्थ्यांना दिलासा दिला.

एमबीए, एमएमएस, बी. एड., बी. पी. एड. आणि हॉटेल मॅनेजमेंट या व्यावसायिक अभ्यासक्रमांच्या प्रवेश परीक्षांच्या दिवशीच मुंबई विद्यापीठाच्या विविध अभ्यासक्रमांच्या परीक्षा घेण्यात येणार होत्या. मात्र, व्यावसायिक अभ्यासक्रमांना प्रवेश घेऊ इच्छिणाऱ्या विद्यार्थ्यांचा विचार करून विद्यापीठाने आठ दिवसांच्या परीक्षा पुढे ढकलल्या आहेत. त्यांचे सुधारित वेळापत्रकही प्रसिद्ध केले आहे. 

सीईटी सेलकडून घेण्यात येणाऱ्या व्यावसायिक अभ्यासक्रमांच्या प्रवेश परीक्षांना सुरुवात झाली आहे. त्यानुसार बीएड जनरल अँड स्पेशल अभ्यासक्रमाची सीईटी २४ ते २६ मार्चदरम्यान होणार आहे, तर २७ मार्च आणि २८ मार्चला बीपीएड आणि हॉटेल मॅनेजमेंट अभ्यासक्रमांची परीक्षा घेतली जाणार आहे. 
________________________________________

'मुंबई विद्यापीठाने आपल्या वाणिज्य, कला आणि विज्ञान शाखांच्या परीक्षांचे नियोजन सीईटी कक्षाचे अंतिम वेळापत्रक ध्यानात ठेवून केले होते. मात्र, त्या वेळापत्रकात बदल झाल्यानंतर आम्हीही आमच्या वेळापत्रकात योग्य बदल केले आहेत. आता आमच्या अनेक परीक्षा सीईटीच्या वेळा टाळून होणार आहेत. कला शाखेची परीक्षा तर आम्ही पुढेच नियोजित केली असून, या विद्यार्थ्यांना सीईटी परीक्षा देण्यात कोणतीही अडचण येणार नाही, याची काळजी घेतली आहे. 
 
डॉ. पूजा रौंदाळे, संचालिका परीक्षा नियोजन व नियंत्रण विभाग