'महाज्योती'च्या चाळणी परीक्षेचा निकाल प्रसिद्ध, निवड प्रक्रियेत होणार बदल.. 

एज्युवार्ता न्यूज नेटवर्क 

महाज्योतीने महाराष्ट्र लोकसेवा आयोग (MPSC), संघ लोकसेवा आयोग (UPSC), महाराष्ट्र लोकसेवा आयोग संयुक्त गट ब व क, महाराष्ट्र अभियांत्रिकी सेवा, स्टाफ सिलेक्शन कमिशन, आय.बी.पी.एस. बँकींग परीक्षा पूर्व प्रशिक्षण 2024-25 (Pre Exam Training 2024-25) करीता घेण्यात आलेल्या चाळणी परीक्षेचा निकाल जाहीर (exam result announced) केला आहे. तसेच महाज्योतीची अधिकृत वेबसाईट https://mahajyoti.org.in वर निवड यादी प्रसिद्ध करण्यात आली आहे. 

नुकतीच महाज्योतीने MPSC, IBPS, SSC यूपीएससी आणि इतर प्रशिक्षणाकरिता संस्था निहाय निवड यादी जाहीर केलेली आहे. या यादीच्या अनुषंगाने काही तक्रारी असल्यास किंवा योग्य गुण असूनही संस्था मिळाली नसल्यास याबाबतच्या तक्रारी करण्याकरिता विद्यार्थ्यांना आज रात्री अकरा वाजेपर्यंतचा वेळ उपलब्ध करून देण्यात आला आहे. विद्यार्थ्यांनी त्यांच्या तक्रारी सोबतच्या नमुन्यामध्ये महाज्योतीच्या ईमेलवर पाठवाव्यात. कोणत्याही विद्यार्थ्यावर अन्याय होणार नाही याची पूर्ण काळजी घेतली जाईल. सर्व तक्रारींचे निराकरण करूनच महाज्योती द्वारा अंतिम यादी निश्चित केली जाईल, प्रसिद्ध करण्यात आलेल्या परिपत्रकात म्हटले आहे. 

या परीक्षांच्या प्रशिक्षणांकरीता प्रशिक्षण संस्था निवडण्याची प्रक्रिया ही स्पर्धा परीक्षा प्रशिक्षण अंमलबजावणी व संनियंत्रण समिती मार्फत करण्यात येत आहे. परंतु महाज्योतीच्या संचालक मंडळाकडे या समितीच्या कामकाजाबाबत विविध तक्रारी आल्या होत्या. याची दखल घेऊन या प्रक्रियेमधून आहेर पडण्याचा निर्णय घेतलेला आहे. त्यामुळे निवड झालेल्या विद्याध्यर्थना प्रशिक्षण देण्याची कार्यवाही करण्यासाठी शासनाकडे मार्गदर्शन मागविण्यात आलेले आहे. त्याबद्दलचे मार्गदर्शन प्राप्त झाल्यावर प्रशिक्षणाबाबत कार्यवाही करण्यात येईल, अशी माहिती महाज्योतीकडून देण्यात आली आहे.

असा पाहता येणार निकाल -

उमेदवाराला प्रथम महाज्योतीचे अधिकृत संकेतस्थळ https://mahajyoti.org.in/en/result-2/ वर जावे लागेल. समोर तुम्हाला विविध परीक्षांची 'Provisionally Selected Candidates' यादी दिसेल. तिथे तुम्हाला तुम्ही जी परीक्षा दिली आहे त्याची पीडीएफ डाऊनलोड करून निकाल पाहाता येणार आहे.