विभागीय सहसंचालक, उच्च शिक्षण सहसंचालक पदांचा अतिरिक्त कार्यभार प्राध्यापकांवर.. 

एज्युवार्ता न्यूज नेटवर्क 

विभागीय सहसंचालक, उच्च शिक्षण तसेच सहसंचालक (Divisional Joint Director, Higher Education as well as Joint Director) (प्रशासन) / (शिक्षण शुल्क समिती) या पदावर अतिरिक्त कार्यभाराने तात्पुरती पदस्थापना करण्यात आली आहे. त्याबाबत उच्च व तंत्रशिक्षण विभागाने (Department of Higher and Technical Education) शासन निर्णय प्रसिद्ध केला आहे. त्यानुसार डाॅ. रणजित निंबाळकर यांची विभागीय सहसंचालक छत्रपती संभाजीनगर व जळगाव, डाॅ. सुबोध भांडारकर यांची विभागीय सहसंचालक अमरावती  तर, डाॅ. केशव तुपे यांच्याकडे विभागीय सहसंचालक मुंबई विभागाचा अतिरिक्त कार्यभार (additional workload) सोपवण्यात आला आहे. 

छत्रपती संभाजीनगर येथील शासकीय न्यायसहाय्यक विज्ञान संस्थेमध्ये प्राध्यापक म्हणून कार्यरत असलेल्या डाॅ. रणजित निंबाळकर यांच्याकडे छत्रपती संभाजीनगर विभाग व जळगाव विभागात विभागीय सहसंचालक (उच्च शिक्षण) म्हणून तात्पुरता पदभार देण्यात आला आहे. तर अमरावती येथे शासकीय विदर्भ ज्ञान विज्ञान संस्थेमध्ये सहयोगी प्राध्यापक म्हणून कार्यरत असलेल्या डाॅ. सुबोध भांडारकर यांची विभागीय सहसंचालक अमरावती विभाग (उच्च शिक्षण) या पदावर अतिरिक्त कार्यभाराने तात्पुरती पद स्थापना करण्यात आली आहे. तर डाॅ. केशव तुपे यांच्याकडे विभागीय सहसंचालक मुंबई (उच्च शिक्षण) या पदाचा कार्यभार सोपवण्यात आला आहे. पुढील आदेश होईपर्यंत अत्यंत तात्पुरत्या स्वरुपात हा कार्यभार सोपवण्यात आला आहे.

नव्याने विभागीय सहसंचालक पदाचा अतिरिक्त कार्यभार सोपविण्यात येत असलेल्या अधिकाऱ्यांचा तपशील नमुद केला असुन ज्या विभागीय सहसंचालक यांच्याकडे कार्यालय बदलून अतिरिक्त कार्यभार सोपविण्यात येत आहे. याशिवाय अतिरिक्त कार्यभारासाठी मुदतवाढ देण्यात आलेल्या अधिकाऱ्यांचा तपशील नमूद करण्यात आला आहे व अतिरिक्त कार्यभार संपुष्टात आणण्यात आलेल्या अधिकाऱ्यांचा तपशील नमुद करण्यात आला आहे. 

महाराष्ट्र लोकसेवा आयोगाकडुन उमेदवार उपलब्ध होईपर्यंत नावासमोर नमुद केल्याप्रमाणे वा इतर कोणत्याही कारणास्तव पुढील शासन आदेश होईपर्यंत यापैकी जे आधी घडेल त्या कालावधीसाठी, त्यांच्या नावासमोर दर्शविलेल्या ठिकाणी विभागीय सहसंचालक, उच्च शिक्षण तसेच सहसंचालक (प्रशासन)/ (शिक्षण शुल्क समिती) या पदावर अतिरिक्त कार्यभाराने पदस्थापना करण्यात येत आहे /मुदतवाढ देण्यात येत आहे. विभागीय सहसंचालक तसेच सहसंचालक (प्रशासन) / (शिक्षण शुल्क समिती) या पदांचा अतिरिक्त कार्यभार धारण करणारे प्राध्यापक/ सहयोगी प्राध्यापक/ प्रशासन अधिकारी सध्या ज्या वेतनश्रेणीत वेतन घेतात त्याच वेतनश्रेणीतील वेतन व भत्ते राहतील.

नव्याने विभागीय सहसंचालक पदाचा अतिरिक्त कार्यभार सोपविलेल्या अधिकाऱ्यांना त्यांच्या कार्यालय प्रमुखांनी तात्काळ कार्यमुक्त करावे आणि संबंधित अधिकारी यांनी त्यांच्या नावापुढे दर्शविलेल्या विभागीय सहसंचालक पदाचा अतिरिक्त कार्यभार पुढील आदेश होईपर्यंत तात्काळ स्विकारावा. याबाबतचा अहवाल संचालक, उच्च शिक्षण, महाराष्ट्र राज्य, पुणे यांनी शासनास सादर करावा, असे शासन निर्णयात म्हटले आहे.