MPSC कडून 2025 च्या संभाव्य परीक्षांचे वेळापत्रक जाहीर
'एमपीएससी'तर्फे नागरी सेवा परीक्षेच्या रचनेत बदल करण्यात आला आहे. हा बदल २०२५ च्या परीक्षेपासून लागू करण्याची घोषणा केली होती. त्यानुसार जुन्या पद्धतीनुसार २०२४ ची परीक्षा शेवटची असेल.
eduvarta@gmail.com 
एज्युवार्ता न्यूज नेटवर्क
महाराष्ट्र लोकसेवा आयोगाने (MPSC) स्पर्धा परीक्षांची तयारी करणाऱ्या उमेदवारांना नियोजन सोपे जावे यासाठी परीक्षांचे संभाव्य वेळापत्रक जाहीर (Probable exam schedule announced) केले आहे . त्यानुसार २०२५ मध्ये सुधारित रचनेसह नागरी सेवा पूर्व परीक्षा सप्टेंबरमध्ये घेण्याचे नियोजित आहे. त्यापूर्वी, महाराष्ट्र नागरी सेवा राजपत्रित मुख्य परीक्षा २०२४ चे आयोजन एप्रिलमध्ये घेण्याचे नियोजित आहे.
उमेदवारांच्या सुविधेसाठी 'एमपीएससी'तर्फे २०२५ मध्ये घेतल्या जाणाऱ्या परीक्षांचे संभाव्य वेळापत्रक जाहीर केले आहे. त्यानुसार २०२४ मध्ये प्रलंबित राहिलेल्या बहुतांश परीक्षा २०२५ मध्ये होतील. २०२५ साठीच्या काही परीक्षाही शेवटच्या काही महिन्यांत पार पडतील. कोरोनामध्ये विस्कळित झालेले वेळापत्रक गेल्या एक-दोन वर्षांत पूर्वपदावर आले होते; परंतु आता हे वेळापत्रक विविध कारणांनी काही अंशी पुन्हा विस्कळित झाले आहे.
'एमपीएससी'तर्फे नागरी सेवा परीक्षेच्या रचनेत बदल करण्यात आला आहे. हा बदल २०२५ च्या परीक्षेपासून लागू करण्याची घोषणा केली होती. त्यानुसार जुन्या पद्धतीनुसार २०२४ ची परीक्षा शेवटची असेल. महाराष्ट्र नागरी सेवा राजपत्रित परीक्षा २०२४ यंदा १ डिसेंबरला घेण्याचे नियोजित आहे. या परीक्षेचा निकाल पुढील वर्षी मार्चपर्यंत जाहीर होईल. यानंतर एप्रिलमध्ये मुख्य परीक्षा घेतली जाईल. त्यानंतर सप्टेंबरमध्ये घेतल्या जाणाऱ्या परीक्षेतून मुख्य परीक्षेला पात्र उमेदवारांना वर्णनात्मक स्वरूपाच्या परीक्षेला सामोरे जावे लागेल.
२०२५ मध्ये होणाऱ्या परीक्षांच्या संभाव्य तारखा
महाराष्ट्र नागरी सेवा राजपत्रित पूर्व परीक्षा २०२४ - १ डिसेंबर २०२४ रोजी घेतली जाईल. त्याचप्रमाणे महाराष्ट्र गट ब (अराजपत्रित) सेवा संयुक्त पूर्व परीक्षा २०२४ - ५ जानेवारी २०२५ रोजी, महाराष्ट्र गट क सेवा संयुक्त पूर्व परीक्षा २०२४ - २ फेब्रुवारी २०२५ रोजी, राज्य सेवा मुख्य परीक्षा २०२४ - २६ ते २८ एप्रिल २०२५ रोजी, महाराष्ट्र वनसेवा मुख्य परीक्षा २०२४ - १० ते १५ मे २०२५ रोजी, महाराष्ट्र स्थापत्य अभियांत्रिकी सेवा मुख्य परीक्षा २०२४ - १८ मे २०२५ रोजी, महाराष्ट्र कृषी सेवा मुख्य परीक्षा २०२४ - १८ मे २०२५ रोजी, महाराष्ट्र गट ब (अराजपत्रित) सेवा संयुक्त मुख्य परीक्षा २०२४ - १ जून २०२५ रोजी, महाराष्ट्र गट क सेवा संयुक्त मुख्य परीक्षा २०२४ - २९ जून २०२५ रोजी, महाराष्ट्र नागरी सेवा राजपत्रित पूर्व परीक्षा २०२५ - २८ सप्टेंबर २०२५ रोजी, महाराष्ट्र गट ब (अराजपत्रित) सेवा संयुक्तपूर्व परीक्षा २०२५ - ९ नोव्हेंबर २०२५ रोजी आणि महाराष्ट्र गट क सेवा संयुक्त पूर्व परीक्षा २०२५ - ३० नोव्हेंबर २०२५ रोजी आयोजित केली जाईल.
