राज्यसेवा २०२४ मुख्य परीक्षेपूर्वी जागा न वाढविल्यास आंदोलन; विद्यार्थ्यांचा सरकारला इशारा

एज्युवार्ता न्यूज नेटवर्क 

महाराष्ट्र लोकसेवा आयोगाकडून (MPSC) ४३१ जागांसाठी महाराष्ट्र राजपत्रित संयुक्त नागरी सेवा पूर्व परीक्षा २०२४ (MPSC exam 2024) (राज्यसेवा) नुकतीच घेण्यात आली.वस्तूनिष्ठ स्वरुपात होणारी ही शेवटची मुख्य परीक्षा असणार आहे. २०२५ पासून राज्यसेवा परीक्षेत बदल होणार असून ती वर्णनात्मक (लेखी) पद्धतीने होणार आहे. राज्यसेवा २०२४ मध्ये खुल्या वर्गासाठी अत्यंत कमी जागा असून शासकीय सेवेतील तहसीलदार, पोलीस उपविभागीय अधिकारी, अशी अनेक पदे रिक्त आहेत. या परीक्षेस 2 लाखावर अर्ज आले आहेत. यात खुला वर्ग मुलांसाठी एकूण फक्त 70 पदे आहेत. त्यामुळे राज्य शासनाने विद्यार्थी हिताचा विचार करता मुख्य परीक्षेपूर्वी राज्यसेवा २०२४ च्या जागांमध्ये वाढ करण्यात यावी,अन्यथा आंदोलन केले जाईल, असा इशारा विद्यार्थ्यांनी दिला आहे.  

उपजिल्हाधिकारी-16, DySP-161, तहसीलदार- 66, नायब तहसीलदार-281, मुख्याधिकारी (अ)- 44, मुख्याधिकारी (ब)- 75, उपशिक्षणाधिकारी- 347 अशा विविध विभागातील मोठ्या प्रमाणावर रिक्त पदे असतानाही यंदाच्या जाहिरातीत DySP, तहसीलदार आणि मुख्याधिकारी यांसारखी महत्त्वाची पदे समाविष्ट नसल्याचे दिसून येते. विशेषतः उपजिल्हाधिकारी पदासाठी खुल्या प्रवर्गात फक्त 1 जागा उपलब्ध आहे. तसेच DySp पद नसल्याने अनेक मुलांचे पोलीस अधिकारी होण्याचे स्वप्न हे स्वप्नच राहणार. त्यामुळे अनेक विद्यार्थ्यांमध्ये नाराजी दिसून येतेय. 

आणखी वाचा : नागपूर महापालिकेत २४५ जागांच्या भरतीसाठी अर्ज प्रक्रिया सुरू... 

MPSC कडून २०२२ मध्ये ६२३ पदांसाठी राज्यसेवा परीक्षा घेण्यात आली होती. यावेळी केवळ ४३१ जागांसाठी परीक्षा घेतली जात आहे. राज्यसेवा २०२४ पूर्व परीक्षा १ डिसेंबरला घेण्यात आली असून एप्रिल महिन्यात मुख्य परीक्षा होणार आहे. मात्र, जागावाढ करण्याचा अधिकार हा राज्य सरकारला आहे. यासाठी सरकारकडून ‘MPSC ’ला पुन्हा सुधारित मागणीपत्र पाठवून इतर जागांची मागणी करावी, अशी विद्यार्थ्यांकडून मागणी केली जात आहे, असे न झाल्यास विविध विद्यार्थी संघटनांमार्फत पुण्यात आंदोलन करण्यात येणार असल्याची माहिती विद्यार्थ्यांनी दिली आहे.

------------------------------------------

"महाराष्ट्र लोकसेवा आयोगाकडून  महाराष्ट्र राजपत्रित नागरी सेवा पूर्व परीक्षा (राज्यसेवा) मुख्य परीक्षेचा वर्णनात्मक (लेखी) पॅटर्न २०२५ पासूनच लागू केला जाणार आहे. यंदा झालेलेली पूर्व परीक्षा व होणारी मुख्य परीक्षा  वस्तूनिष्ठ स्वरुपातील ही शेवटची परीक्षा असणार आहे. त्यामुळे राज्य शासनाच्या विविध विभागातील एक हजार पेक्षा जास्त रिक्त आहेत, यांचा समावेश याच परीक्षेच्या जाहिरातीत समावेश करावा.

- महेश घरबुडे, अध्यक्ष 
स्पर्धा परीक्षा विध्यार्थी असोसिएशन.

--------------------------------

"राज्यसेवा परीक्षा 2024 ही Objective Attempt ची शेवटची परीक्षा असल्याने त्यात महत्वाच्या असणाऱ्या उपजिल्हाधिकारी, तहसीलदार, पोलीस उपअधीक्षक या पदांचा समावेश झालेला नाही. माझी सर्व MPSC विद्यार्थ्यांच्यावतीने सरकारला विनंती आहे. राज्यसेवा 2024 मध्ये जास्तीत जास्त पदांचा समावेश करावा,अन्यथा आम्हाला संविधानिक मार्गाने आंदोलन करावे लागेल."
- डॉ.अजित काकडे, परीक्षार्थी