नागपूरात आयआयटी विद्यार्थ्याची आत्महत्या, परीक्षेच्या पहिल्याच दिवशी धक्कादायक प्रकार

एज्युवार्ता न्यूज नेटवर्क

शिक्षण क्षेत्रातून धक्कादायक घटना समोर आली आहे. भारतीय माहिती तंत्रज्ञान संस्था, नागपूर (IIIT Nagpur) येथे द्वितीय वर्षातील विद्यार्थी श्रेयश माने (Student Shreyash Mane) याने वसतिगृहाच्या नवव्या माळ्यावरून उडी घेऊन आत्महत्या (Student's Suicide) केली. परीक्षेच्या पहिल्याच दिवशी ही घटना घडली आहे. श्रेयश अनेक दिवसांपासून वर्गात नियमित येत नव्हता. तो नवव्या माळ्यावर राहतही नव्हता, तरीही तो तेथे गेला आणि या कृत्याला प्रवृत्त झाला. बुटीबोरी पोलिसांनी (Nagpur Crime News) घटनेचा अधिक तपास सुरू केला असून, आत्महत्येचे नेमके कारण शोधण्यात येत आहे.

देशातील प्रतिष्ठित तंत्रशिक्षण संस्थांमध्ये विद्यार्थ्यांच्या आत्महत्यांच्या घटना सातत्याने वाढत आहेत. गेल्या पाच वर्षांत एकूण ६५ विद्यार्थ्यांनी आत्महत्या केल्याची धक्कादायक माहिती समोर आली आहे. केवळ गेल्या दोन वर्षांतच सुमारे ३० विद्यार्थ्यांनी स्वतःचे जीवन संपविले. यात आयआयटी कानपूरमध्ये ९, आयआयटी खरगपूरमध्ये ७ तर आयआयटी मुंबईमध्ये १ विद्यार्थ्याचा समावेश आहे. या पार्श्वभूमीवर पुन्हा एका घटनेने संपूर्ण शिक्षण क्षेत्राला हादरवले आहे.

ही घटना केवळ एक वैयक्तिक दुर्घटना नसून, तंत्रशिक्षण क्षेत्रातील वाढत्या दबावाची गंभीर समस्या दर्शवते. स्पर्धात्मक परीक्षा, उच्च अपेक्षा, अभ्यासाचा प्रचंड भार, सामाजिक-कुटुंबीय दबाव आणि भविष्याची चिंता यामुळे विद्यार्थ्यांच्या मानसिक आरोग्यावर परिणाम होत आहे. अनेक विद्यार्थी एकटेपणा, डिप्रेशन आणि तणावाशी दोन हात करतात, परंतु वेळीच मदत मिळत नाही. IIIT, IIT, NIT सारख्या संस्थांमध्ये काउन्सेलिंग सुविधा उपलब्ध असल्या तरी त्यांचा वापर अपुरा राहतो. विद्यार्थी समस्या व्यक्त करण्यास संकोच करतात किंवा मदत मागण्याची भीती वाटते.

शिक्षणतज्ज्ञांच्या मते, श्रेयश मानेसारख्या घटनांमुळे संपूर्ण समाजाने विचार करणे गरजेचे आहे. शिक्षण संस्थांनी केवळ डिग्री देण्यापलीकडे विद्यार्थ्यांना ‘जीवन कौशल्ये’ शिकवावीत. पालकांनी अपेक्षांचा बोजा कमी करावा आणि विद्यार्थ्यांनी समस्या मित्र, कुटुंब किंवा काउन्सेलरशी मोकळेपणे बोलावीत. एका विद्यार्थ्याच्या मृत्यूमागे संपूर्ण यंत्रणेचे अपयश असते. या समस्या सोडवण्यासाठी तातडीने पावले उचलणे आवश्यक आहे, जेणेकरून भविष्यात अशा दुर्दैवी घटना टाळता येतील.