रेल्वे भरती परीक्षांमध्ये मराठीचा समावेश; महाराष्ट्रातील उमेदवारांना मोठा दिलासा

एज्युवार्ता न्यूज नेटवर्क 

महाराष्ट्रातील लाखो रेल्वे नोकरी इच्छुकांसाठी एक महत्त्वाची आणि दिलासादायक बातमी समोर आली आहे. रेल्वे भरती परीक्षांमध्ये (Railway Recruitment Examination) आता मराठी भाषेचा समावेश (Inclusion of the Marathi Language) करण्यात येणार असून, यामुळे राज्यातील उमेदवारांना मोठा फायदा होणार आहे. आतापर्यंत ‘कॉम्प्युटर बेस्ड टेस्ट’ (CBT) परीक्षांसाठी हिंदी किंवा इंग्रजी भाषा अनिवार्य होती. मात्र, आता या निर्णयात बदल करण्यात आला असून मराठी भाषेचा समावेश करण्यात आला आहे.  

मध्य रेल्वेने घेतलेल्या या महत्त्वपूर्ण निर्णयानुसार, CBT परीक्षा मराठीसह इतर प्रादेशिक भाषांमध्येही घेण्यात येणार आहेत. त्यामुळे महाराष्ट्रातील उमेदवारांना आता त्यांच्या मातृभाषेतून परीक्षा देण्याची संधी मिळणार आहे. हा निर्णय महाराष्ट्र नवनिर्माण सेनेच्या सातत्यपूर्ण पाठपुराव्यामुळे घेतल्याचे सांगितले जात आहे.

रेल्वे भरती मंडळाअंतर्गत (RRB) २०२६ मध्ये होणाऱ्या विविध भरती परीक्षा नव्या नियमांनुसार घेणार आहे. यामध्ये RRB NTPC आणि Group D या प्रमुख परीक्षांचा समावेश आहे. RRB Group D अंतर्गत सुमारे २२ हजार १९५ पदांची भरती अपेक्षित असून, RRB NTPC अंतर्गत ८ हजार ८६८ पदांसाठी परीक्षा होणार आहे. याशिवाय पश्चिम रेल्वे अंतर्गत ॲप्रेंटिस पदांसाठी ५ हजार ३४९ जागांची थेट भरती प्रक्रिया सुरू आहे. 

मराठी भाषेचा समावेश झाल्यामुळे ग्रामीण आणि मराठी माध्यमातून शिक्षण घेतलेल्या विद्यार्थ्यांना मोठा फायदा होणार आहे. या निर्णयामुळे महाराष्ट्रातील विद्यार्थ्यांचा आत्मविश्वास वाढण्याची शक्यता असून, स्पर्धा परीक्षांमध्ये त्यांचा सहभाग अधिक प्रभावी होईल, आणि रेल्वेत मराठी टक्का वाढेल, अशी अपेक्षा व्यक्त केली जात आहे.