एम.फिल. उमेदवारांना नेट परीक्षेतून सूट देण्याचा जीआर प्रसिद्ध; पात्र, अपात्र प्राध्यापकांची नावे जाहीर

एज्युवार्ता न्यूज नेटवर्क 

एमफील पदवी धारक (MPhil degree holder) तब्बल 1 हजार 421 प्राध्यापकांना नेट परीक्षेतून सूट (exemption from NET exam)देण्याचा अध्यादेश अखेर प्रसिद्ध करण्यात आला आहे त्यात विद्यापीठ निहाय संबंधित पात्र व अपात्र प्राध्यापकांची नावे जाहीर करण्यात आली आहेत. उच्च शिक्षण विभागातर्फे तब्बल 212 पानांचा जीआर प्रसिद्ध झाला आहे.तसेच संबंधित प्राध्यापकांच्या पदोन्नतीचा प्रश्नही लवकरच मार्गी लावणार असल्याचे आश्वासन उच्च व तंत्र शिक्षण मंत्री चंद्रकांत पाटील (Minister of Higher and Technical Education Chandrakant Patil)यांनी दिले. 

विद्यापीठ अनुदान आयोगाच्या निर्णयानुसार 11 जुलै 2009 पूर्वी एम.फील पदवी पूर्ण केलेल्या आणि 14 जून 2006 रोजी किंवा त्यापूर्वी नियुक्त झालेल्या प्राध्यापकांना नेट परीक्षेतून सूट देण्यात आले आहे. विद्यापीठ अनुदान आयोगाच्या या संदर्भात अनेक बैठका झाल्या. 2 जुलै 2025 रोजीच्या पत्रकाद्वारे शासनाला संबंधित पात्र व अपात्र प्राध्यापकांची नावे पाठविण्यात आली. राज्यातील राष्ट्रसंत तुकडोजी महाराज नागपूर विद्यापीठ, डॉ.बाबासाहेब आंबेडकर मराठवाडा विद्यापीठ, सावित्रीबाई फुले पुणे विद्यापीठ, स्वामी रामानंद तीर्थ मराठवाडा विद्यापीठ, कवयित्री बहिणाबाई चौधरी उत्तर महाराष्ट्र विद्यापीठ, संत गाडगेबाबा अमरावती विद्यापीठ, मुंबई विद्यापीठ, शिवाजी विद्यापीठ, पुण्यश्लोक अहिल्यादेवी होळकर विद्यापीठ, गोंडवाना विद्यापीठ, एसएनडीटी विद्यापीठ आणि शासकीय महाविद्यालयांमधील दोन प्राध्यापक अशा एकूण 1 हजार 421 पात्र प्राध्यापकांची 50 अपात्र प्राध्यापकांची यादी प्रसिद्ध करण्यात आली आहे.

दरम्यान, महाराष्ट्र राज्याच्या विधिमंडळ अधिवेशनात मंत्री चंद्रकांत पाटील यांनी एम. फिल. प्राध्यापकांच्या पदोन्नती संदर्भात व नवीन प्राध्यापक पद भरती संदर्भात घोषणा केल्यानंतर या विषयात अनेक वर्षांपासून पाठपुरावा करणाऱ्या विद्यापीठ विकास मंचाच्या शिष्टमंडळाने चंद्रकांत पाटील यांचे आभार मानले. तसेच एम.  फिल. प्राध्यापकांचा पदोन्नतीचा विषय कॅम्प लावून पूर्ण करण्यासाठी सोमवारी पुण्यात त्यांची भेट घेऊन पदोन्नतीचा प्रश्न मार्गी लाव मागणी केली.त्यावर तात्काळ अंमलाबजावणी करण्याचे आश्वासन देऊन संबंधित अधिकाऱ्यांना याबाबत सूचना दिल्या. यावेळी विद्यापीठ विकास मंचचे अध्यक्ष एन. डी. पाटील , सचिव परमेश्वर हासबे , प्रदेश कार्यालय मंत्री राहुल पाखरे , राज्यपाल नियुक्त व्यवस्थापन परिषद सदस्य डॉ. गजानन सानप , शिवाजी विद्यापीठाचे व्यवस्थापन परिषद सदस्य स्वागत परुळेकर , व्यवस्थापन परिषद सदस्य प्रा डॉ संतराम मुंडे ,निमंत्रक डॉ.सर्जेराव जीगे , एम. फील. कृती समिती निमंत्रक डॉ. अशोक कोरडे व एस. एम. पवार यांच्यासह विविध सिमेंट सदस्य उपस्थित होते.