मुंबई विद्यापीठाच्या माजी कुलगुरू डाॅ. स्नेहलता देशमुख यांचे निधन 

एज्युवार्ता न्यूज नेटवर्क 

मुंबई विद्यापीठाच्या (University of Mumbai) माजी कुलगुरू (Former Vice-Chancellor) डॉ. स्नेहलता  देशमुख (Dr. Snehlata Deshmukh Death) यांचे सोमवारी (दि.29 ) वयाच्या 85 व्या वर्षी दीर्घ आजाराने निधन झाले. सायंकाळी विलेपार्ले येथील स्मशानभूमीत त्यांच्या पार्थिवावर अंत्यसंस्कार करण्यात येतीत, अशी माहिती देण्यात आली आहे. 

डॉ. स्नेहलता देशमुख या शिव येथील लोकमान्य टिळक रुग्णालयाच्या अधिष्ठात्या होत्या. 1995 मध्ये त्यांची मुंबई विद्यापीठाच्या कुलगुरू म्हणून नियुक्ती झाली. आपल्या पाच वर्षांच्या कार्यकाळात त्यांनी अनेक धडाडीचे आणि महत्त्वाचे निर्णय घेतले होते. त्यातील एक महत्त्वाचा निर्णय म्हणजे विद्यापीठाच्या पदवी प्रमाणपत्रावर त्या विद्यार्थ्याच्या किंवा विद्यार्थिनीच्या आईचे नावही लिहिणे.

गर्भसंस्कार, नवजात शिशू आणि माता यांचा आहार या विषयावर महत्वाचे कार्य केले आहे. गर्भसंस्कार तंत्र आणि मंत्र, तंत्रयुगातील उमलती मने, अरे संस्कार संस्कार इत्यादी पुस्तके स्नेहलता देशमुख यांनी लिहली आहेत. त्यांच्या सामाजिक कार्यासाठी त्यांना डॉ. बी.सी. रॉय पुरस्कार, धन्वंतरी पुरस्कार, हे पुरस्कार मिळाले होते. सध्या त्या मुंबईच्या पार्ले टिळक विद्यालय संस्थेच्या संचालक मंडळ विश्वस्त म्हणून त्या कार्यरत होत्या.
______________________________

मुंबई विद्यापीठाच्या माजी कुलगुरू डॉ. स्नेहलता देशमुख यांच्या निधनाचे वृत्त धक्कादायक आहे. डॉ. स्नेहलता देशमुख प्रसिद्ध बालरोगतज्ज्ञही होत्या. मुंबई विद्यापीठाच्या कुलगुरू म्हणून त्यांनी अनेक विद्यार्थीहिताचे निर्णय घेऊन त्यांच्या भविष्याला आकार दिला. विद्यापीठाच्या पदवी प्रमाणपत्रावर विद्यार्थ्याच्या आईचेही नाव बंधनकारक असावे, हा त्यांनी घेतलेला निर्णय अतिशय उल्लेखनीय आहे. डॉ. स्नेहलता देशमुख यांना भावपूर्ण श्रद्धांजली. ईश्वर त्यांच्या कुटुंबीयांना या दुःखातून सावरण्याचे बळ देवो. 
 
चंद्रकांत पाटील (उच्च व तंत्रशिक्षण मंत्री)