कुलसचिव नियुक्ती वादाच्या पत्रांची मंगळवारी शहानिशा

एज्यूवार्ता न्यूज नेटवर्क 

सावित्रीबाई फुले पुणे विद्यापीठाच्या कुलसचिव (Savitribai Phule Pune University Registrar) पदाच्या नियुक्तीवरून निर्माण झालेल्या वादावर तक्रारदारांचे म्हणणे ऐकून घेण्यासाठी विद्यापीठातर्फे समिती स्थापन (Committee constituted by the University)करण्यात आली आहे.येत्या मंगळवारी (दि.30) दुपारी बारा वाजता सर्व तक्रारदारांना या समितीसमोर आपले म्हणणे सादर करण्याची संधी देण्यात आले आहे. या समितीकडे लेखी तक्रार देणाऱ्या विविध संस्था, संघटना व व्यक्तींना मंगळवारी विद्यापीठात बोलवले आहे.तक्रारीत किती तथ्य आहे, यांची शहानिशा केली जाईल. 

सावित्रीबाई फुले पुणे विद्यापीठाच्या कुलसचिव पदाच्या मुलाखती (Interviews for the post of Registrar)सुमारे पंधरा दिवसांपूर्वी घेण्यात आल्या. मात्र ,मुलाखतीच्या दिवसापासूनच विविध व्यक्ती, संस्था व संघटनांनी कुलसचिव पदासाठी नियुक्त केल्या जाणाऱ्या संभाव्य उमेदवाराबाबत लेखी तक्रारी देण्यास सुरुवात केली. या तक्रारीमध्ये काही गंभीर स्वरूपाचे आरोप करण्यात आले. त्यावर विद्यापीठाने विधी विभागाचा सल्ला घेतला. विधी विभागाच्या सल्ल्यानुसार आता एका समितीच्या माध्यमातून या सर्व तक्रारींची शहानिशा करण्यात येणार आहे. 

विद्यापीठाचे माजी आधिसभा सदस्य यांच्यासह राजकीय व सामाजिक क्षेत्रात काम करणाऱ्या संघटनांचे प्रतिनिधी यांनी विद्यापीठाकडे संभाव्य कुलसचिव पदाच्या उमेदवाराबाबत आक्षेप घेत लेखी निवेदने दिली होती. या सर्व निवेदनांवर समितीच्या माध्यमातून संबंधित व्यक्तीच्या तक्रारीवर जाणून घेतल्या जातील. त्यामुळे या तक्रारीवर अंतिम निर्णय झाल्यानंतर कुलसचिव नियुक्तीबाबत पुढील निर्णय घेतला जाऊ शकतो,असे बोलले जात आहे.