अखेर शिक्षकांची मागणी मान्य, माहिती देण्याचा एक वार ठरला; शिक्षण आयुक्तांचे आदेश
माहितीचा वार शनिवार या उपक्रमाची पथदर्शी स्वरूपात अंमलबजावणी करण्यात आली. या उपक्रमाबाबत 90 टक्के शिक्षकांनी आनंद व्यक्त केला. तसेच शिक्षकांना शिकवण्यासाठी पुरेसा वेळ मिळाला, असे मत 96.6 टक्के शिक्षकांनी व्यक्त केले. सतत माहिती भरण्याच्या कटकटीतून काही प्रमाणात सुटका झाल्याचे शिक्षकांनी समाधान मानले.
eduvarta@gmail.com 
एज्युवार्ता न्यूज नेटवर्क
राज्याच्या शालेय शिक्षण विभागाकडून शिक्षकांना अशैक्षणिक कामे दिले जात असल्याने वेळोवेळी शिक्षक संघटनांनी याबाबत तीव्र नाराजी व्यक्त केली होती. तसेच दररोज वेगवेगळ्या प्रकारची माहिती मागवण्याऐवजी त्यासाठी आठवड्यातील एक वार निश्चित करावा, अशी मागणी करण्यात आली होती. त्यावर आता राज्याचे शिक्षण आयुक्त सचिंद्र प्रताप सिंह यांनी सर्व शिक्षकांनी दर शनिवारी माहिती सादर करावी असे आदेशाचे पत्र काढले आहे.
राज्याच्या शालेय शिक्षण विभागाने शिक्षकांच्या शैक्षणिक व अशैक्षणिक कामांबाबत सूचना प्रसिद्ध केले आहेत तसेच शिक्षकांची अशैक्षणिक कामे शैक्षणिक कामे व बालकांचा मोफत व सक्तीचा शिक्षणाचा अधिकार यामधील कलमानुसार कामांचे वर्गीकरण केले आहे. शिक्षकांची अशैक्षणिक कामे खरी कमी करण्याबाबत शासनाकडे अहवाल सादर करण्यात आला होता. त्यानुसार विविध समित्यांचे एकत्रीकरण करून चार समित्या तयार करण्यात आल्या. यु-डायस व सरल प्रणालीचे एकत्रीकरण करून एकाच पोर्टलवर माहिती भरण्याची सुविधा देण्यात आली. त्याशिवाय पीएम पोषण योजनेमध्ये नोंदवहीतील नोंदीचे काम कमी करण्यासाठी पोर्टलवर सुविधा देऊन लातूर जिल्ह्यासाठी पतदर्शी अभ्यास करण्यात आला.
केंद्र शासनाच्या व राज्य शासनाच्या विविध उपक्रमांचा अहवाल ऑफलाइन ऑनलाइन स्वरूपात शाळा स्तरावरून द्यावा लागतो. तसेच जिल्हास्तर तालुकास्तर केंद्र स्तरावरही माहिती शाळांना द्यावी लागते. यामुळे शिक्षकांचा अध्ययन- अध्यापनाचा वेळ माहिती तयार करण्यात व ऑनलाईन ऑफलाइन स्वरूपात माहिती सादर करण्यात जात असल्याचे शिक्षण विभागाच्या निदर्शनास आले.
प्राथमिक शिक्षण संचालनालयामार्फत राज्यातील कोल्हापूर जिल्ह्यातील पन्हाळा, बीड जिल्ह्यातील आष्टी, नंदुरबार जिल्ह्यातील अक्कलकुवा, गडचिरोली जिल्ह्यातील प्रत्येकी एका केंद्रामध्ये माहितीचा वार शनिवार या उपक्रमाची पथदर्शी स्वरूपात अंमलबजावणी करण्यात आली. या उपक्रमाबाबत 90 टक्के शिक्षकांनी आनंद व्यक्त केला. तसेच शिक्षकांना शिकवण्यासाठी पुरेसा वेळ मिळाला, असे मत 96.6 टक्के शिक्षकांनी व्यक्त केले. सतत माहिती भरण्याच्या कटकटीतून काही प्रमाणात सुटका झाल्याचे शिक्षकांनी समाधान मानले. शिक्षकांना वर्गातील अध्यापनासाठी अधिक वेळ मिळाला.तसेच विद्यार्थ्यांची अधिक संवाद साधण्याची संधी मिळाली. या सर्व बाबींचा विचार करून शैक्षणिक वर्ष 2026 27 पासून माहिती सादर करण्यासाठी शनिवार हा एक वार निश्चित करण्यात आला आहे.
विविध प्रकारच्या अहवालासाठीची आवश्यक माहिती शाळांनी शनिवारी सादर करावी. त्याचप्रमाणे राज्य, विभाग,जिल्हा, केंद्र, तालुका स्तरावरून मागितल्या जाणाऱ्या विषय निहाय माहितीसाठी शनिवार हा वार निश्चित करावा. या व्यतिरिक्त शिक्षकांनी व्हीएसके पोर्टल वरील विद्यार्थी उपस्थिती, पीएम पोषण पोर्टल वरील आहार दिलेल्या विद्यार्थी संखेची नोंद, विद्यार्थी सुरक्षा, विधिमंडळ कामकाज, आपत्कालीन परिस्थिती यांच्याशी संबंधित माहिती तात्काळ द्यावी, असेही शिक्षण आयुक्तांनी प्रसिद्ध केलेल्या पत्रकात नमूद केले आहे.
