राज्यातील प्रत्येक शाळेत आता 'माजी विद्यार्थी संघ'; शिक्षण विभागाच्या सूचना
शाळा स्तरावर माजी विद्यार्थी संघ स्थापन करण्याबाबत व माजी विद्यार्थी मेळावे, स्नेहसंमेलने आयोजित करण्याबाबत सर्व व्यवस्थापनाच्या व सर्व माध्यमाच्या शाळांना आवाहन करण्यात येत आहे. राज्यातील सर्व शाळांमध्ये (इयत्ता 1 ली ते 12 वी) शाळेतील माजी विद्यार्थ्यांना एकत्र करून त्या विद्यार्थ्यांचा "माजी विद्यार्थी संघ" स्थापन करण्यात यावा.
eduvarta@gmail.com 
एज्युवार्ता न्यूज नेटवर्क
राज्यातील जिल्हा परिषद, महानगरपालिका, खाजगी अनुदानित, विनाअनुदानित सर्व शाळांमध्ये (Zilla Parishad, Municipal Corporation, Private Aided, Unaided Schools) माजी विद्यार्थी संघ स्थापन करण्याचे आवाहन शालेय शिक्षण विभागाकडून करण्यात आले आहे. याबाबतचा शासन निर्णय शिक्षण विभागाने नुकताच प्रसिद्ध (Government decision published) केला आहे. त्यानुसार आता सर्व शाळांमध्ये शिक्षण घेऊन बाहेर पडलेल्या सर्व माजी विद्यार्थ्यांची संघ समिती स्थापन करण्यात येणार आहे. राज्यातील सर्व शाळांमध्ये शाळा स्तरावर माजी विद्यार्थी संघ (Former Students Sangh) स्थापन करण्याबाबत व माजी विद्यार्थी मेळावे, स्नेहसंमेलने आयोजित करण्याबाबत सर्व व्यवस्थापनाच्या व सर्व माध्यमाच्या शाळांना आवाहन करण्यात येत आहे. राज्यातील सर्व शाळांमध्ये (इयत्ता 1 ली ते 12 वी) शाळेतील माजी विद्यार्थ्यांना एकत्र करून त्या विद्यार्थ्यांचा "माजी विद्यार्थी संघ" स्थापन करण्यात यावा. यासाठी पुढील मार्गदर्शक तत्त्वे व कार्यसूची निश्चित करण्यात यावी, असे शासन निर्णयात नमूद करण्यात आले आहे.
फार्मसीच्या 3 हजार जागा घटल्या ; कट-ऑफ वाढणार, प्रवेशासाठी विद्यार्थ्यांमध्ये चुरस
माजी विद्यार्थी संघ समितीची रचना -
माजी विद्यार्थी संघासाठी अध्यक्ष, उपाध्यक्ष, कोषाध्यक्ष म्हणून सर्वानुमते निवडलेला शाळेचा माजी विद्यार्थी/विद्यार्थी असेल. तर सचिव म्हणून शाळेचे मुख्याध्यापक असतील. तसेच सदस्य हे स्थानिक व नोकरी / उद्योग / व्यवसायासाठी बाहेरगावी स्थायिक असणारे माजी विद्यार्थी असतील. शाळेचे एक उपक्रमशील शिक्षक / अध्यापक / मुख्याध्यापक / प्राचार्य प्रतिनिधी, एक पालक प्रतिनिधी, एक सेवानिवृत्त अधिकारी व एक सेवानिवृत्त शिक्षक हे सल्लागार म्हणून काम बघतील. संबंधित शाळेत शिक्षण घेतलेला कोणताही माजी विद्यार्थी ऑनलाईन /ऑफलाईन नोंदणी करून संघाचे सभासदत्व घेऊ शकेल. प्रत्येक शाळेत शासनाने पुरविलेल्या ऑनलाईन प्रणालीवर माजी विद्यार्थी सदस्यांची नोंदणी करण्यात यावी तसेच शाळेच्या स्तरावर सदस्यांची यादी ठेवण्यात यावी. माजी विद्यार्थी संघाचा मेळावा, स्नेहसंमेलन वर्षातून किमान एक वेळा आयोजित करण्यात यावे. माजी विद्यार्थी संघ समितीच्या वर्षातून किमान 2 बैठका घेण्यात याव्यात. आवश्यकता असेल तेव्हा या समितीची बैठक सदस्यांच्या सोयीनुसार सर्वसंमतीने ऑनलाईन प्रणालीद्वारे किंवा ऑफलाईन पध्दतीने आयोजित करण्यात यावी, असे नमूद करण्यात आले आहे.
माजी विद्यार्थी संघ स्थापन करण्याची शासकीय भूमिका -
शाळांचा/विद्यालयांचा दर्जा उंचवण्यासाठी समाजातील सर्व घटकांचा सहभाग वाढविणे. माजी विद्यार्थ्यांना शाळेच्या/विद्यालयांच्या शैक्षणिक विकासात थेट सहभागी करुन घेणे. शिक्षणाचा दर्जा ग्रामीण व शहरी भागात समान रीतीने उंचावण्यास मदत करणे. माजी विद्यार्थ्यांचे शाळा/ विद्यालयासोबत असणारे ऋणानुबंध घट्ट करणे. माजी विद्यार्थ्यांनी मिळविलेल्या यशापासून शाळेमध्ये / विद्यालयांमध्ये शिकणाऱ्या विद्यार्थ्यांना प्रेरणा देणे. माजी विद्यार्थ्यांचे आपल्या गावाशी, मातीशी संबंध दृढ करणे. शासन या उपक्रमासाठी धोरणात्मक पाठबळ व समन्वय उपलब्ध करून देईल. शाळांनी नियोजित मेळावे / स्नेहसंमेलन आयोजनासाठी आवश्यक खर्चाची प्रतिपूर्ती वेतनेतर अनुदान / इतर निधीतून करावी. विभागीय आयुक्त, जिल्हाधिकारी, मुख्य कार्यकारी अधिकारी, शिक्षण उपसंचालक, प्राचार्य डाएट, शिक्षणाधिकारी / प्रशासन अधिकारी यांच्यामार्फत सर्व शाळा / विद्यालयांमध्ये या संघाच्या स्थापनेची कार्यवाही वेळेत पूर्ण केली जाईल. या उपक्रमातून राज्यभरात चांगले काम करणाऱ्या माजी विद्यार्थी संघाच्या यशोगाथा संपूर्ण राज्यात प्रसारित केल्या जातील, त्यामुळे इतर शाळांना देखील प्रेरणा मिळेल व या संघांचा देखील सन्मान होईल. झ) माजी विद्यार्थी संघातील सर्व सदस्यांची नोंदणी करण्यासाठी आयुक्त (शिक्षण), शिक्षण आयुक्तालय, महाराष्ट्र राज्य, पुणे यांनी ऑनलाईन प्रणालीची सुविधा उपलब्ध करून द्यावी, असे शासन निर्णयात म्हटले आहे.
