फार्मसीच्या 3 हजार जागा घटल्या ; कट-ऑफ वाढणार, प्रवेशासाठी विद्यार्थ्यांमध्ये चुरस

एज्युवार्त न्यूज नेटवर्क 

यंदा फार्मसी प्रवेशासाठी (Pharmacy Admission Process) मोठी चुरस पाहायला मिळणार आहे. कारण मागील वर्षाच्या तुलनेत यंदा प्रवेशाच्या एकूण जागांमध्ये मोठा प्रमाणावर घट झाल्याचे दिसून येत आहे. फार्मसी कौन्सिल ऑफ इंडियाने  (पीसीआय) नियम न पाळणाऱ्या तब्बल 89 संस्थांना प्रवेश प्रक्रियेबाहेर (89 institutions out of admission process) ठेवले. या कारवाई कारवाईमुळे बी. फार्म आणि डी. फार्म अशा दोन्ही अभ्यासक्रमाच्या 92 संस्था आणि तब्बल 3 हजार 247 जागा कमी झाल्या (3 thousand 247 seats reduced) आहेत. नोंदणी केलेल्या विद्यार्थ्यांची संख्या अधिक असून जागा कमी झाल्याने प्रवेशासाठी मोठी चुरस असणार आहे. शिवाय यामुळे महाविद्यालयांचा कट-ऑफ देखील वाढण्याची शक्यता आहे.

चिंताजनक! राज्यातील ३९४ शाळा विद्यार्थ्यांविना, 'यू-डायस प्लस' नोंदणीच्या आकडेवारीतून धक्कादायक वास्तव समोर..

या वर्षी डी. फार्म (पदविका) अभ्यासक्रमासाठी 35 हजार 535 विद्यार्थ्यांनी अर्ज दाखल केले आहेत. 607 संस्थांमध्ये एकूण 37 हजार 895 जागा उपलब्ध असून पहिली प्रवेश यादी 7 ऑक्टोबरला जाहीर होणार आहे. तर बी. फार्म (पदवी) अभ्यासक्रमासाठी तब्बल 52 हजार 466 विद्यार्थ्यांनी अर्ज दाखल केले आहेत. 501 संस्थांमधील 40 हजार 710 जागा असून पहिली यादी 3 ऑक्टोबर रोजी जाहीर होणार आहे.

गेल्या वर्षी राज्यात बी. फार्मसाठी 515 संस्थांत 41 हजार 282 जागा उपलब्ध होत्या, तर डी. फार्मसाठी 685 संस्थांमध्ये तब्बल 40 हजार 570 जागा होत्या. मात्र यंदा पीसीआयच्या कारवाईमुळे बी. फार्ममध्ये संस्थांची संख्या 501 पर्यंत आहे. तर जागा 572 ने कमी होऊन 40 हजार 710 इतक्या आहेत. डी. फार्ममध्येही संस्थांची संख्या मोठ्या प्रमाणात घटली आहे. 78 संस्थांची घट झाली आहे. यंदा 607 संस्थामध्ये 37 हजार 895 इतक्याच जागा आहेत. म्हणजेच एकत्रित पाहता यंदा फार्मसी अभ्यासक्रमात जवळपास 3 हजार 250 जागांची घट झाली आहे.

गेल्या वर्षीच्या प्रवेश प्रक्रियेत मात्र मोठ्या प्रमाणात जागा रिक्त राहिल्या होत्या. बी. फार्ममध्ये 515 संस्थांत 41 हजार 282 जागा उपलब्ध होत्या, परंतु त्यापैकी तब्बल 12 हजार 714 जागा रिकाम्या होत्या. डी. फार्ममध्ये 685 संस्थांत 40 हजार 570 जागा असूनही 12 हजार 404 जागा रिकाम्या होत्या. म्हणजेच दोन अभ्यासक्रम मिळून जवळपास 25 हजार जागा रिकाम्या राहिल्या होत्या. त्यामुळेच यंदा जागांची संख्या घटल्या तरी उशिरा प्रवेश होत असल्यामुळे किती विद्यार्थी प्रवेश घेतात हे पहावे लागणार आहे. कारण यंदा उपलब्ध जागापेक्षा प्रवेश घेण्यासाठी नोंदणी केलेल्या विद्यार्थ्यांची संख्या अधिक आहे.

बी. फार्मसाठी 52 हजार 466 विद्यार्थ्यांनी नोंदणी केली आहे. तर जागा फक्त 40 हजार 710 आहेत, म्हणजे 11 हजार 756 विद्यार्थी अधिक आहेत. त्याचप्रमाणे डी. फार्मसाठी 35 हजार 535 विद्यार्थ्यांनी अर्ज केले असून उपलब्ध जागा 37 हजार 895 आहेत, त्यामुळे या पदविका अभ्यासक्रमात तुलनेने जागा शिल्लक जागा राहण्याची शक्यता आहे.