परसबाग तयार करून बक्षीसे मिळवा; शिक्षण विभागाकडून स्पर्धा

एज्युवार्ता न्यूज नेटवर्क

विद्यार्थ्याच्या (students) हितासाठी शिक्षण विभागामार्फत (department of education) विविध उपक्रम राबवले जातात. त्यातच आता पुन्हा एकदा शिक्षण विभागाने नवा उपक्रम (New initiative) राबवण्याचा पवित्रा घेतला असून शाळांमध्ये परसबाग उपक्रम (Backyard gardening activities in schools) सुरू करण्यासाठी प्रोत्साहनपर स्पर्धा (Incentive competition) शिक्षण विभागाकडून घेतली जात आहे. 

पंतप्रधान पोषणशक्ती निर्माण योजनेंतर्गत सर्व शाळांमध्ये विद्यार्थ्यांना पौष्टिक आहार उपलब्ध होण्याच्या उद्देशाने ही स्पर्धा आयोजित करण्यात आली आहे. त्याचा तालुकानिहाय निकाल ऑक्टोबर मध्ये लागणार असून जिल्हानिहाय निकाल नोव्हेंबरमध्ये जाहीर होणार आहेत. यासाठी विविध बक्षिसेही दिली जाणार आहेत.

आताच्या मुलांना बाहेरील खाद्यपदार्थाची सवय लागली आहे, त्यामुळे मुलांच्या आरोग्यावर परिणाम होत आहे. त्यामुळे सर्व शाळांमध्ये परसबागा तयार कराव्यात. त्यात तयार होणारा भाजीपाला, फळे विद्यार्थ्यांना शालेय पोषण आहारात द्यावीत, हा यामागचा उद्देश आहे. यासंदर्भात शाळांच्या परिसरातील संबंधित तज्ज्ञ, कृषी तज्ज्ञ किंवा संस्थांचे मार्गदर्शन शाळांनी घ्यावे, अशी सूचनाही शिक्षण विभागाने दिल्या आहे.

या स्पर्धेत अनेक विषय देण्यात आले असून त्यानुसार गुणदेखील देण्यात आले आहे. त्यात परसबागेची रचना १० गुण, हवामानानुसार भाज्यांची लागवड २० गुण, देशी वाणांचा वापर १० गुण, मायक्रो ग्रीन पद्धतीचा वापर ५ गुण, कमी पाणी लागणाऱ्या भाज्या ५ गुण आणि परस बागेचे व्यवस्थापन यासाठी एकूण २५ गुण देण्यात येणार आहे. याशिवाय अशा प्रकारे २० विषयांना एकूण १०० गुण असतील.

तालुकास्तरावरील पारितोषिके 

राज्यात उत्कृष्ट परसबागा तयार होण्यासाठी प्रोत्साहनपर बक्षिसांची रक्कमही देण्यात येणार आहे. तालुकास्तरावर प्रथम क्रमांकाच्या परसबागेस ११ हजार, द्वितीय क्रमांक आठ हजार, तृतीय क्रमांकासाठी पाच हजार आणि प्रोत्साहनपर प्रत्येकी तीन शाळांना दोन हजार रुपये, याप्रमाणे बक्षिसांची रक्कम दिली जाणार आहे.

जिल्हास्तरावर बक्षिसे 

जिल्हास्तरावर प्रथम क्रमांकाच्या परसबागेसाठी २१ हजार, द्वितीयसाठी १५ हजार रुपये, तृतीय क्रमांकासाठी ११ हजार रुपये, तर प्रोत्साहनपर प्रत्येकी तीन शाळांना तीन हजार रुपये बक्षिसांची रक्कम निश्चित केली आहे.