पवित्र पोर्टलमधील शिक्षक भरतीतही भ्रष्टाचार; जिल्हा मराठा विद्या प्रसारक समाज संस्थेतील प्रकार
समितीमध्ये तपासणी अधिकारी म्हणून अहिल्यानगर जिल्हा परिषदेतील योजना विभागातील शिक्षणाधिकारी बाळासाहेब बुगे, उपशिक्षण अधिकारी आकाश दरेकर आणि सहाय्यक उपशिक्षण निरीक्षक श्रीराम थोरात यांची नियुक्ती केली आहे.
eduvarta@gmail.com 
एज्युवार्ता न्यूज नेटवर्क
अहिल्यानगर येथील नामांकित शिक्षण संस्था म्हणून ओळखल्या जाणाऱ्या जिल्हा मराठा विद्या प्रसारक समाज (District Maratha Vidya Prasarak Samaj Sanstha)या शैक्षणिक संस्थेत पवित्र पोर्टलच्या (Pavitra Portal)माध्यमातून केल्या जात असलेल्या शिक्षक भरती प्रक्रियेत मोठा भ्रष्टाचार (Major corruption in teacher recruitment process) झाला असल्याची तक्रार समोर आली आहे. याप्रकरणी अहिल्यानगर शिक्षणाधिकाऱ्यांनी या घटनेची सखोल चौकशी करण्यासाठी समिती स्थापन केली आहे. तसेच अहिल्यानगर तोफखाना पोलीस स्टेशन येथे तक्रारही देण्यात आली आहे. त्यामुळे शिक्षण क्षेत्रात भरती प्रक्रियेत होत असलेला घोटाळा पुन्हा एकदा चव्हाट्यावर आला आहे.
शिक्षण विभागात गेल्या काही महिन्यांपासून मोठ्या प्रमाणावर भ्रष्टाचार होत असल्याच्या घटना समोर येत आहेत. त्यातच आता श्रीरामपूर येथील संजय हिरामण जाधव यांनी पोलिसांकडे अहमदनगर जिल्हा मराठा विद्या प्रसारक समाज या संस्थेत पवित्र पोर्टलच्या माध्यमातून होत असलेल्या भरतीत मोठा भ्रष्टाचार झाला असल्याची तक्रार दिली आहे. त्यात एका जागेसाठी दहा उमेदवार बोलावण्यात आले, पैसे गोळा करण्यासाठी माणसे नेमण्यात आली, चालू असलेला भ्रष्टाचार थांबवावा, पवित्र पोर्टलचा गैरवापर केला जात आहे, अशी तक्रार केली आहे. त्यामुळे याप्रकरणी जिल्हा परिषदेच्या माध्यमिक शिक्षण अधिकारी संध्या गायकवाड यांनी त्रीसदस्य समिती स्थापन केली आहे. तक्रारीला धरून पवित्र पोर्टलच्या माध्यमातून केल्या जाणाऱ्या भरती प्रक्रियेत पारदर्शकता व एकसूत्रीपणा राहण्यासाठी स्टॅंडर्ड ऑपरेटिंग प्रोसिजर (एसओपी) ची अंमलबजावणी झाली किंवा कसे? याबाबत सखोल चौकशी करून दोन दिवसात अहवाल सादर करावा, असे पत्रक काढले आहे.
या चौकशी समितीमध्ये तपासणी अधिकारी म्हणून अहिल्यानगर जिल्हा परिषदेतील योजना विभागातील शिक्षणाधिकारी बाळासाहेब बुगे, उपशिक्षण अधिकारी आकाश दरेकर आणि सहाय्यक उपशिक्षण निरीक्षक श्रीराम थोरात यांची नियुक्ती केली आहे.
दरम्यान, या प्रकरणी संस्थेची बाजू जाणून घेण्यासाठी संस्थेचे अध्यक्ष रामचंद्र दरे यांच्याशी संपर्क साधला असता त्यांनी सचिव विश्वासराव आठरे यांच्याशी संपर्क करण्यात सांगितले तर विश्वासराव आठरे यांच्याशी संपर्क साधला असता त्यांनी अध्यक्ष रामचंद्र दरे यांच्याशी बोलण्यास सांगितले. त्यामुळे संस्थेत घडलेल्या प्रकाराबाबत संस्थेचे पदाधिकारी काहीही बोलण्यास तयार नसल्याचे दिसून आले. परिणामी या संस्थेत शिक्षक भरती प्रक्रियेत घोटाळा झाला किंवा नाही हे चौकशी समितीने केलेल्या तपासणीतूनच समोर येईल.
