संस्थाचालकांच्या जाचातून सुटका, काॅलेजच्या प्राध्यापकांचे 'कॅश 'आता विद्यापीठात होणार
प्राध्यापकांच्या जिव्हाळ्याच्या 'कॅश' मध्येही सुधारणा करण्याचा निर्णय घेतला आहे. अनेक प्राध्यापकांना 'कॅश' साठी संस्थाचालकांचा त्रास सहन करावा लागतो. यातून मुक्तता मिळण्यासाठी विद्यापीठ पातळीवर 'कॅश' करण्यात येणार आहेत. त्याठिकाणी संस्थाचालक किंवा त्यांचे प्रतिनिधी उपस्थित राहिले नाहीत तरी कोरम पूर्ण होत असेल तर संबंधित प्राध्यापकांना नियमानुसार पदोन्नती मिळेल.
eduvarta@gmail.com 
एज्युवार्ता न्यूज नेटवर्क
डॉ. बाबासाहेब आंबेडकर मराठवाडा विद्यापीठाने (Dr. Babasaheb Ambedkar Marathwada University) महाविद्यालयातील प्राध्यापकांच्या दृष्टीने महत्त्वाचा निर्णय घेतला आहे. या निर्णयामुळे प्राध्यापकांची संस्थाचालकांच्या जाचातून सूटका होणार असल्याचे बोलले जात आहे. विद्यापीठाने संलग्न महाविद्यालयातील प्राध्यापकांच्या पदोन्नतीसाठी 'करिअर अॅडव्हान्स स्कीम' (कॅश) राबविण्यात येते. त्यात मोठ्या प्रमाणात प्राध्यापकांची आर्थिक पिळवणूक होत असल्याचे समोर आले आहे. त्यामुळे येत्या शैक्षणिक वर्षापासून विद्यापीठ प्रशासन प्राध्यापकांचे 'कॅश' थेट विद्यापीठात आयोजित (Career Advance Scheme organized at the university) करण्यात येणार असल्याची माहिती विद्यापीठाने दिली आहे.
डॉ. बाबासाहेब आंबेडकर मराठवाडा विद्यापीठाचे कुलगुरू डॉ. विजय फुलारी यांनी परीक्षा, प्रशासनात बदल करण्याचा सपाटाच लावला आहे. संलग्न महाविद्यालयातील गैरप्रकार रोखण्यासाठी त्यांनी मोठी तयारी केल्याचे समोर येत आहे. पदव्युत्तर महाविद्यालयातील गुणवत्ता तपासण्यासाठी बाहेरील तज्ज्ञांचा समावेश असलेल्या समित्या पाठविण्याचा निर्णय घेतला आहे. त्यामुळे केवळ प्रवेशापुरते पदव्युत्तर अभ्यासक्रम चालविणाऱ्यांचे धाबे दणाणले आहे. नुकत्याच झालेल्या परीक्षा मंडळाच्या बैठकीत मोठ्या प्रमाणात परीक्षांमध्ये सुधारणा करणारे निर्णय त्यांच्याकडून घेण्यात आले आहेत. त्यामुळे त्यांचा दृष्टीकोण परीक्षा सुधारण्याचा आहे हे तर स्पष्ट झाले आहे.
सेट परीक्षेचा पेपर फुटल्याची अफवा; विद्यापीठाकडून पोलिसांकडे तक्रार
महाविद्यालय आणि विद्यापीठातील तासिकांकडे अधिक लक्ष देण्यात येणार आहे. त्यासाठी काही अभ्यासक्रमांना विद्यार्थ्यांच्या ७५ टक्के उपस्थितीच्या निर्णयाची अंमलबजावणी करण्यात येणार आहे. त्याच वेळी प्राध्यापकांच्या जिव्हाळ्याच्या 'कॅश' मध्येही सुधारणा करण्याचा निर्णय घेतला आहे. अनेक प्राध्यापकांना 'कॅश' साठी संस्थाचालकांचा त्रास सहन करावा लागतो. यातून मुक्तता मिळण्यासाठी विद्यापीठ पातळीवर 'कॅश' करण्यात येणार आहेत. त्याठिकाणी संस्थाचालक किंवा त्यांचे प्रतिनिधी उपस्थित राहिले नाहीत तरी कोरम पूर्ण होत असेल तर संबंधित प्राध्यापकांना नियमानुसार पदोन्नती मिळेल. ज्या प्राध्यापकांचे 'कॅश' प्रस्ताव पाठविण्यात येणार नाहीत, त्या महाविद्यालयाच्या प्राचार्यावर जबाबदारी निश्चित करीत कारवाई करण्यात येईल, अशी माहितीही विद्यापीठ प्रशासनाने दिली.
