एमपीएससी सेवा पूर्व परीक्षा 2024 उत्तीर्ण उमेदवारांना बार्टीमार्फत आर्थिक सहाय्य

एज्युवार्ता न्यूज नेटवर्क 

अनुसूचित जातीतील उमेदवारांसाठी मोठी बातमी आहे. बार्टी मार्फत (BARTI) महाराष्ट्र राज्यातील अनुसूचित जातीचे जे उमेदवार (Candidates belonging to Scheduled Castes in Maharashtra) महाराष्ट्र लोकसेवा आयोग स्थापत्य अभियांत्रिकी सेवा पूर्व परीक्षा 2024 (Maharashtra Public Service Commission Civil Engineering Service Preliminary Exam 2024) उत्तीर्ण झाले आहेत अशा उमेदवारांना मुख्य परीक्षेसाठी आर्थिक सहाय्य देण्यात येणार आहे. यासाठी अनुसूचित जातीच्या पात्र उमेदवारांना पंधरा हजार रुपये आर्थिक सहाय्य मिळणार आहे. 

या योजनेसाठी उमेदवार महाराष्ट्र राज्यातील व अनुसूचित जातीचा असावा. तसेच उमेदवार दिनांक 8 एप्रिल 2025 रोजी जाहीर झालेल्या महाराष्ट्र लोकसेवा आयोग स्थापत्य अभियांत्रिकी सेवा पूर्व परीक्षा 2024 उत्तीर्ण असावा.

अर्ज कसा करावा ? 

उमेदवाराने दिलेल्या लिंकवर (गुगल फॉर्म) जाऊन दिनांक 18 मे 2025 पूर्वी ऑनलाईन अर्ज भरावा. उमेदवारांसाठी ऑनलाईन अर्ज भरणे बंधनकारक असणार आहे. संपूर्ण अर्ज व्यवस्थित वाचून भरल्याची खात्री केल्यानंतरच उमेदवाराने अर्ज जमा करावा. अपूर्ण माहिती भरल्यास अथवा माहिती लपवल्यास कोणत्याही टप्प्यावर सदर विद्यार्थ्यांची उमेदवारी बार्टी पुणे मार्फत रद्द करण्यात येईल व आर्थिक सहाय्याची संपूर्ण रक्कम वसूल करण्यात येणार आहे. एकाच विद्यार्थ्याने वेगवेगळी माहिती भरून एकापेक्षा जास्त वेळा अर्ज भरल्यास विद्यार्थ्यांची उमेदवारी रद्द करण्यात येईल. ऑनलाइन अर्ज व्यतिरिक्त उमेदवाराने सदर जाहिराती सोबत जोडलेला अर्ज अचूक भरून अर्जासोबत खाली नमूद केलेल्या कागदपत्रांची व साक्षांकित छायांकित एक प्रत बार्टी पुणे कार्यालयास पोस्ट कुरियर द्वारे दिनांक 20 मे 2025 रोजी संध्याकाळी पाच पर्यंत पाठवावी. याबरोबरच कागदपत्राच्या पाकिटावर एमपीएससी स्थापत्य अभियांत्रिकी 2024 मुख्य परीक्षा आर्थिक सहाय्य असे नमूद करावे. 

कागदपत्रे कोणती हवी? 

जातीचा दाखला / जात वैधता प्रमाणपत्र (कोणतेही एक)

रहिवासी दाखला / डोमासाईल प्रमाणपत्र

एमपीएससी स्थापत्य अभियांत्रिकी सेवा पूर्व परीक्षा 2024 चे प्रवेश पत्र

आधार कार्ड

कोणत्याही राष्ट्रीयकृत बँक पासबुक च्या पहिल्या पानाची छायांकित प्रत (बँक खाते फक्त अर्जदाराच्या नावानेच असावे पालक नातेवाईक मित्र यांच्या बँक खात्याचा तपशील दिल्यास अर्जदाराची उमेदवारी रद्द करण्यात येईल.)

दरम्यान, या योजनेचा लाभ घेण्यासाठी दोन्ही स्वरूपात म्हणजेच ऑनलाइन व ऑफलाइन अर्ज करणे बंधनकारक आहे. केवळ ऑनलाइन अर्ज किंवा फक्त हार्ड कॉपी जमा केल्यास उमेदवाराचा अर्ज ग्राह्य धरला जाणार नाही असे बार्टीचे महासंचालक सुनील वारे यांनी परिपत्रकाद्वारे सांगितले आहे.