बार्टीच्या विद्यार्थ्यांचा पेट्रोल ओतून पेटून घेण्याचा प्रयत्न; ठिय्या आंदोलन सुरूच

एज्युवार्ता न्यूज नेटवर्क 

गेल्या अडीच वर्षांपासून डॉ. बाबासाहेब आंबेडकर संशोधन व प्रशिक्षण संस्था (Dr. Babasaheb Ambedkar Research and Training Institute) बार्टीचे (Barti) विद्यार्थी अधिछात्रवृत्तीच्या मागणीसाठी लढा देत आहेत. मात्र, शासनाकडून कुठलीही गंभीर दखल घेतली जात नसल्याने एका विद्यार्थ्याने ठिय्या आंदोलनादरम्यान (Indefinite hunger strike)स्वतःच्या अंगावर पेट्रोल टाकून जाळून घेण्याचा प्रयत्न केला, असे बार्टी संशोधक विद्यार्थी संघर्ष कृती समितीच्या (Barti Researcher Student Struggle Action Committee)पदाधिकाऱ्यांनी सांगितले.तसेच शासनाकडून प्रश्न सोडवला जात नाही तोपर्यंत बेमुदत उपोषण सुरूच ठेवणार असल्याचे आंदोलक विद्यार्थ्यांनी 'एज्युवार्ता' शी संवाद साधतांना नमूद केले. 

राज्य शासनाने २५ जुलै रोजी घेतलेल्या निर्णयानुसार ५० टक्के अवार्ड डेट नुसार अधिछात्रवृत्ती देण्याच्या निर्णयाविरोधात पुण्यातील डॉ. बासाहेब आंबेडकर संशोधन व प्रशिक्षण संस्था बार्टी येथे संशोधक विद्यार्थी गंगाधर दुगाने याने अंगावर पेट्रोल ओतून बार्टी कार्यालयाच्या मुख्य प्रवेशद्वारासमोर आत्मदहनाचा प्रयत्न केला. यावेळेस त्या संशोधक विद्यार्थ्यांने १०० टक्के दराने अधिछात्रवृत्ती नोंदणी दिनांकापासून देण्यात यावी, या मागणी संदर्भात घोषणाबाजी केली. 

बार्टी कार्यालयासमोर गेल्या काही दिवसांपासून २५ जुलै २०२४ च्या अधिछात्रवृत्ती निर्णयाच्या विरोधात बेमुदत उपोषण सुरू करण्यात आले. आंदोलनाच्या चौथ्या दिवशी अधिछात्रवृत्ती कागदपत्र पडताळणीवर एकमताने बहिष्कार टाकण्यात आला.  १०० टक्के अधिछात्रवृत्तीचा निर्णय घेतल्याशिवाय कोणत्याही प्रकारची प्रक्रिया होऊ न देण्याचा निर्णय विद्यार्थ्यांनी घेतला. याच अनुषंगाने बार्टी संशोधक विद्यार्थी संघर्ष कृती समितीच्या विद्यार्थ्यांनी मुख्य प्रवेशद्वार बंद करून ठिय्या केले. या दरम्यान २०२२ च्या संशोधक विद्यार्थ्याने १०० टक्के अधिछात्रवृत्तीचा हमारा हक्क है अशी घोषणा देत स्वतःच्या अंगावर पेट्रोल टाकून जीवंत जाळून घेण्याचा प्रयत्न केला. यावेळी पल्लवी गायकवाड, हर्षवर्धन दवणे, स्वप्नील नारबाग, प्रतीक झाडे, अनुपम सोनाळे, अंकित राऊत, मनोहर सोनाकांबळे, मीना आरसे, सचिन पवळे जयवंत आठवले, उत्तम शेवाडे आदी आंदोलक विद्यार्थी उपस्थित होते. 

'एज्युवार्ता' शी संवाद साधतांना गंगाधर दुगाने हा विद्यार्थी म्हणाला, उच्च शिक्षण घेण्याचे स्वप्न उराशी बाळगून मी पीएच.डी. साठी प्रवेश घेतला.मात्र, राज्य शासनाने सुमारे अडीच वर्षांपासून बार्टीच्या विद्यार्थ्यांच्या शिष्यवृत्तीचा प्रश्न प्रलंबित ठेवला आहे. शिष्यवृत्ती मिळेल या विचाराने संशोधनासाठी काही मित्रा व नातेवाईक यांच्याकडून मी सुमारे दीड लाख रुपये उसने पैसे घेतले आहेत.परंतु, शासन शिष्यवृत्तीबाबत कोणताही निर्णय घेत नाही. शासनाला सर्व विद्यार्थ्यांनी रोहित वेमुला व्हावे,असे वाटते की काय, अशी शंका येते.माझा सय्यम संपल्यामुळे उद्विग्न होऊन मी अंगावर पेट्रोल ओतून पेटवून घेण्याचा प्रयत्न केला.