२६८ शिक्षकांनी घेतला बदलीचा लाभ, खोट्या माहितीचा पर्दाफाश

एज्युवार्ता न्यूज नेटवर्क 

अकोला जिल्हा परिषदेत (Akola Zilla Parishad) तब्बल २६८ शिक्षकांनी बदलीचा लाभ (Transfer Scam) घेण्यासाठी बोगस दिव्यांग आणि खोट्या आजारांची प्रमाणपत्रं सादर (Presentation of False Information) केल्याचा आरोप करण्यात आला आहे. सामाजिक आणि आरटीआय कार्यकर्ते गणेश कुरई (Ganesh Kurai) यांनी तक्रार केल्यानंतर ही धक्कादायक बाब उघडकीस आली आहे. याप्रकरणी आतापर्यंत नऊ शिक्षकांसह एका गट शिक्षणाधिकाऱ्याला निलंबित (9 Teachers Suspended) करण्यात आले. तर इतर २६८ शिक्षक आणि काही अधिकारी चौकशीच्या फेऱ्यात अडकले आहेत.  

काही शिक्षकांनी खोटी माहिती सादर केली. काहींनी सोयीच्या ठिकाणी, जवळच्या ठिकाणी बदल्या मिळविण्यासाठी शारीरिक अपंगत्वाची, आजारपणाची खोटी प्रमाणपत्रेही जोडली. या प्रकरणी विविध संघटनांनी तक्रारी केल्या. खोटी माहिती सादर केलेल्या नऊ शिक्षकांचे निलंबन करण्यात आले. त्यानंतर तक्रारींची संख्या वाढल्याने काही शिक्षकही चौकशीच्या फेऱ्यात आले. शिक्षण विभागाकडून कार्यवाही सुरू असून अनेक प्रमाणपत्रावर आक्षेप घेतले आहेत.

यामध्ये बोगस कर्णबधीर प्रमाणपत्र, खोटा आजार, तीस किमीपेक्षा जास्त अंतरातील शाळा, चुकीचा गंभीर आजार दाखविणे, प्रमाणपत्र काढल्याचे आक्षेप होते. शासनाचा नियम होता की याची तपासणी 'जिल्हा शल्य चिकित्सकांनी' करावी, पण अकोला प्रशासनाने जाणीवपूर्वक ही तपासणी तालुका स्तरावरच्या डॉक्टरांकडून करून घेतली आणि बोगस प्रमाणपत्रांना 'क्लीन चिट' दिली असल्याचा आरोप गणेश कुरई यांच्याकडून करण्यात आला आहे.

अकोला जिल्हा परिषदेत झालेला शिक्षक बदली घोटाळा हा केवळ प्रशासकीय चूक नसून, तो राज्य शासनाच्या डोळ्यात धूळ फेकून केलेला हजारो कोटींचा 'भ्रष्ट संघटित गुन्हा' असल्याचा आरोप तक्रारीमध्ये करण्यात आला आहे. या घोटाळ्याला अभय देणाऱ्या आणि दस्तऐवज लपवणाऱ्या सर्व जबाबदार अधिकाऱ्यांची चौकशी करून त्यांना तात्काळ निलंबित करण्याची मागणी करण्यात आली आहे.