SPPU विद्यापीठाचा 125 वा पदवी प्रदान समारंभ 5 डिसेंबरला; 93 हजार 219 विद्यार्थ्यांना प्रमाणपत्राचे वितरण

एज्युवार्ता न्यूज नेटवर्क 

सावित्रीबाई फुले पुणे विद्यापीठ (Savitribai Phule Pune University) अमृत महोत्सवी वर्ष साजरे करत असून या अमृत महोत्सवी वर्षात विद्यापीठाचा 125 वा पदवी प्रदान समारंभ (Graduation Ceremony) येत्या ५ डिसेंबर रोजी आयोजित करण्यात आला आहे. नीती आयोगाचे सदस्य आणि जवाहरलाल नेहरू विद्यापीठाचे कुलपती विजयकुमार सारस्वत (Vijayakumar Saraswat, Member of NITI Aayog and Chancellor of Jawaharlal Nehru University) यांच्या प्रमुख उपस्थितीत विद्यापीठाच्या इरावती कर्वे सभागृहात पदवी प्रदान समारंभ पार पडणार आहे. विद्यापीठातर्फे 93 हजार 219 विद्यार्थ्यांना पदवी प्रमाणपत्राचे वितरण केले जाणार आहे. 

सावित्रीबाई फुले पुणे विद्यापीठाच्या पदवी प्रदान समारंभास नीती आयोगाचे सदस्य आणि जवाहरलाल नेहरू विद्यापीठाचे कुलपती विजयकुमार सारस्वत यांच्यासह राज्यपाल व विद्यापीठाचे कुलपती सी पी राधाकृष्णन, कुलगुरू डॉ. सुरेश गोसावी डॉ.प्र-कुलगुरू काळकर, प्रभारी कुलसचिव डॉ.ज्योती भाकरे, परीक्षा व मूल्यमापन मंडळाचे संचालक डॉ.महेश काकडे उपस्थित राहणार आहेत. यावेळी विविध विद्या शाखांमधील 17 गुणवंत विद्यार्थ्यांना सुवर्णपदकाचे वितरण केले जाणार आहे. त्यात सावित्रीबाई फुले पुणे विद्यापीठाच्या कमवा व शिका योजनेअंतर्गत श्रीमती नीलिमाताई पवार सुवर्णपदक हे 2023-24 मध्ये उत्कृष्ट कार्य करणाऱ्या संगमनेर कॉलेजच्या दिपाली माने या विद्यार्थिनीला दिले जाणार आहे. तसेच पी सी अलेक्झांडर अंतर विद्यापीठीय मराठी वक्तृत्व स्पर्धेचे प्रथम क्रमांकाचे पारितोषिक संत गाडगेबाबा अमरावती विद्यापीठाच्या श्रावणी रोडे हिला तर द्वितीय क्रमांकाचे पारितोषिक मुंबई विद्यापीठाच्या श्रेया कुलकर्णी या विद्यार्थिनीला दिले जाणार आहे. पदवी प्रधान समारंभानंतर सर्व विद्यार्थ्यांना त्यांनी अर्जात नमूद केलेल्या पत्त्यावर पोस्टाद्वारे पदवी प्रमाणपत्र पाठविले जाणार आहे. 

विद्यापीठातर्फे 73 हजार 113 विद्यार्थ्यांना पदवी प्रमाणपत्र 19 हजार 841 विद्यार्थ्यांना पदव्युत्तर पदवी प्रमाणपत्र, 93 विद्यार्थ्यांना पदविका प्रमाणपत्र, 61 विद्यार्थ्यांना पीजी डिप्लोमा डिग्री तर 165 विद्यार्थ्यांना पीएचडी प्रमाणपत्र दिले जाणार आहे, अशी माहिती सावित्रीबाई फुले पुणे विद्यापीठातर्फे आयोजित करण्यात आलेल्या पत्रकार परिषदेत देण्यात आली. पत्रकार परिषदेस सावित्रीबाई फुले पुणे विद्यापीठाचे कुलगुरू डॉ.सुरेश गोसावी, प्र- कुलगुरू पराग काळकर परीक्षा व मूल्यमापन मंडळाचे संचालक डॉ.महेश काकडे आदी उपस्थित होते.