धक्कादायक प्रकार! शाळेत मेथी आणल्याने विद्यार्थ्याला दंड; शिक्षण विभागाची कारणे दाखवा नोटीस
मीरा-भाईंदर येथील तपोवन शाळेत पर्युषण काळात अन्नाबाबतच्या निर्बंधांवरून वाद निर्माण झाला आहे; मेथीची भाजी आणल्याबद्दल एका विद्यार्थ्याकडून कथितरीत्या शुल्क आकारण्यात आले होते.
Eduvarta
एज्युवार्ता न्यूज नेटवर्क
मिरा-भाईंदर येथील तपोवन विद्यालयात पर्युषण पर्वाच्या काळात विद्यार्थ्यांच्या डब्यातील खाद्यपदार्थांवरून नवा वाद निर्माण झाला आहे. जैन धर्मीयांसाठी महत्त्वाच्या या कालावधीत शाळेत कांदा, लसूण, गाजर, बटाटा, आले आणि बीट यांसारख्या भाज्या आणण्यास बंदी घालण्यात आली होती. यापूर्वी भाजप आमदार नरेंद्र मेहता यांच्या शाळेतील अशाच आदेशामुळे संताप व्यक्त झाला होता. आता भाईंदर पूर्वेतील या शाळेत एका विद्यार्थ्याने डब्यात मेथीची भाजी आणल्याने त्याच्याकडून दंड उकळण्यात आल्याची धक्कादायक घटना समोर आली आहे. ही शाळा जैन समुदायाशी संबंधित संस्थेची असल्याचे सांगितले जाते.
शाळेत विद्यार्थ्यांचे डबे नियमित तपासले जात आहेत. एका विद्यार्थ्याच्या डब्यात मेथीची भाजी आढळताच त्याच्या वहीवर ‘बंदी असलेली मेथीची भाजी’ असा शेरा मारण्यात आला. विद्यार्थ्याला घरून आणलेला डबा खाऊ न देता कॅन्टीनमधील अन्न देण्यात आले आणि त्या बदल्यात रक्कम आकारण्यात आली. पालकांचे म्हणणे आहे की, हा प्रकार अप्रत्यक्ष दंडच आहे. पर्युषण काळात कांदा-बटाट्यासारख्या भाज्या आणल्यास ५० रुपये दंड आकारण्याची घटना ताजी असतानाच मेथीवरही बंदी घालण्याच्या या प्रकरणाने पालकांमध्ये तीव्र नाराजी पसरली आहे.
यापूर्वी पर्युषण पर्वातील नियमावली आणि दंडाबाबत तक्रार मिळाल्यानंतर मीरा-भाईंदर महानगरपालिकेच्या शिक्षण अधिकारी सुलभा वठारे यांनी तपोवन विद्यालयाला कारणे दाखवा नोटीस बजावली होती. मात्र आता मेथीच्या भाजीबाबतही दंड आकारण्याच्या नव्या प्रकारामुळे पालकांचा रोष वाढला आहे. मेथी आणल्याबद्दल आकारलेली रक्कम कॅन्टीनचा चार्ज आहे की दंड, असा प्रश्न उपस्थित केला जात आहे. आहाराच्या मुद्यावरून शाळा आणि पालक यांच्यात वाद चिघळण्याची चिन्हे दिसत आहेत. शिक्षण विभागाच्या नोटीसनंतरही शाळेकडून अशा प्रकारच्या कारवाई सुरू असल्याची तक्रार पालकांकडून होत आहे.
विद्यार्थ्यांच्या आहारावर धार्मिक बंधने लादणे आणि त्यासाठी दंड आकारणे योग्य आहे का, असा सवाल आता उपस्थित होत आहे. पालक आपल्या मुलांच्या हक्कांसाठी आवाज उठवत असून प्रशासनाने याबाबत तातडीने चौकशी करावी, अशी मागणीही केली जात आहे. हा प्रकार मिरा-भाईंदरमधील शाळांमधील खाद्यधोरणाबाबत नवा वाद निर्माण करणारा ठरला आहे.
