'डियर इडली चटणी नो सांबार'; परीक्षेचे हॉलतिकीट होतंय व्हायरल!

एज्युवार्ता न्यूज नेटवर्क 

'डियर इडली चटणी नो सांबार' (IDLI CHUTNEY NO SAMBHAR') हे वाक्य एखाद्या हॉटेलच्या मेन्यू कार्डवर लिहिलेले नसून देशातील महत्वाच्या परीक्षांपैकी एक समजल्या जाणार्‍या GATE परीक्षेच्या हॉलतिकिटवरील आहे. अॅडमिट कार्डवर विद्यार्थ्यांच्या नावाच्या ऐवजी 'डियर इडली चटणी नो सांबार' लिहिलेले हॉलतिकीट सध्या सोशल मीडियावर चांगलेच व्हायरल होत आहे. (It is on the GATE exam hallticket.)

एका रेडिट वापरकर्त्याने या ई-मेलचा स्क्रीनशॉट शेअर केल्यावर या प्रकरणाला वेग आला. या पोस्टला २ हजाराहून अधिक अपवोट मिळाले असून नेटकरी मजेशीर मीम्स आणि विनोदी प्रतिक्रिया देत आहेत. 

GATE २०२५ हॉलतिकीट 7 जानेवारीला डाउनलोड करण्यासाठी उपलब्ध करून देण्यात आले होते. पण हॉलतिकीटावर उमेदवारांची नावे लिहिण्याऐवजी ही मजेदार ओळ दिसली. ई-मेल पाहिल्यानंतर, विद्यार्थी गोंधळले आहेत. ही तांत्रिक चूक आहे, विनोद आहे की, जाणूनबुजून केलेला प्रयोग आहे, असा संभ्रम निर्माण झाला आहे. 

सदर पोस्ट व्हायरल झाल्यानंतर, आयआयटी रुरकीने अधिकृत निवेदन प्रसिद्ध करत यावर स्पष्टीकरण दिले आहे. संस्थेने  निवेदनात म्हटले आहे की, "GATE २०२५ चे आयोजन करणाऱ्या आयआयटी रुरकीला काही अर्जदारांना पाठवलेल्या ई-मेलमध्ये चुकीचे अभिवादन आढळले आहे. ही एक तांत्रिक चूक होती, जी त्वरित दुरुस्त करण्यात आली. योग्य नावांसह ई-मेल पाठवण्यात आले आहेत. झालेल्या गैरसोयीबद्दल,आम्ही माफी मागतो."

GATE २०२५ परीक्षा १ फेब्रुवारी ते १६ फेब्रुवारी दरम्यान होणार आहे. ही एक राष्ट्रीय पातळीवरील परीक्षा आहे ज्याद्वारे विद्यार्थी पदव्युत्तर आणि डॉक्टरेट कार्यक्रमांमध्ये प्रवेश घेऊ शकतात किंवा सार्वजनिक उपक्रमांमध्ये नोकरी मिळवू शकतात. यावर्षी ही परीक्षा आयआयटी रुरकी द्वारे आयोजित केली जात आहे.