दहावीच्या परीक्षेला एकाच परीक्षा केंद्रावर १० बोगस विद्यार्थी सापडले

एज्युवार्ता न्यूज नेटवर्क

महाराष्ट्र राज्य माध्यमिक शिक्षण मंडळामार्फत (Maharashtra State Board of Secondary Education) २० फेब्रुवारीपासून इयत्ता दहावीच्या परीक्षेला सुरुवात झाली आहे. मात्र, सोलापूर जिल्ह्यात शिक्षण विभागाला हादरून सोडणारी घटना समोर आली आहे. मंगळवेढा येथील एकाच परीक्षा केंद्रावर (Mangalvedha Exam Center) तब्बल १० बोगस विद्यार्थी परीक्षा देताना आढळून आले (10 bogus students found) आहेत. यामुळे शिक्षण विभागाचे धिंडवडे निघाले आहेत. हा प्रकार उघड झाला त्यामुळे संबंधितांवर कारवाई केली जाणार आहे. मात्र असे १०-१० बोगस विद्यार्थी आढळत असतील तर, ही गंभीर बाब आहे. या प्रकारामुळे दहावीच्या परीक्षेसाठी आजही बोगस विद्यार्थी परीक्षा देत असल्याचे स्पष्ट झाले आहे. 

विविध ठिकाणी कॉपीच्या घटना उघडकीस आल्याने शासनाच्या कॉपीमुक्त अभियानास हरताळ फासण्यात आला आहे. भरारी पथकाकडून परीक्षा केंद्रावरील कॉपी प्रकरणावरुन विद्यार्थ्यांवर नियमानुसार कारवाई करण्यात आली. मात्र, मंगळवेढा येथील दहावीच्या परीक्षेत मराठी पेपरला चक्क 10 बोगस विद्यार्थी आढळून आले आहेत. या बोगस विद्यार्थ्यांवर केंद्रप्रमुखांच्या तक्रारीनंतर पोलिसांनी कारवाई केली आहे. मंगळवेढा तालुक्यातील बाळकृष्ण विद्यालय व कनिष्ठ महाविद्यालय नंदेश्वर येथे  दहावीच्या परीक्षेत चक्क 10 बोगस विद्यार्थी आढळून आले आहेत. त्यामध्ये नऊ विद्यार्थी व एका विद्यार्थिनीचा समावेश आहे. 

मंगळवेढ्यातीलच सुतार इंटरनॅशनल स्कूल लक्ष्मी दहिवडी या शाळेतील विद्यार्थी नंदेश्वर येथील बाळकृष्ण विद्यालयात परीक्षेसाठी होते. परीक्षा सुरू करताना सर्व विद्यार्थ्यांची ओळखपत्र तपासणी दरम्यान दहा बोगस विद्यार्थी आढळून आले आहेत. या दहा विद्यार्थ्यांवर केंद्र प्रमुखांनी बोर्डाच्या नियमानुसार कारवाई करीत रीतसर पोलीस तक्रार दिली आहे, अशी माहिती केंद्रसंचालक विठ्ठल एकमल्ली यांनी दिली.