विद्यापीठाच्या परीक्षेच्या मानधनात वाढ होणार?; विद्या परिषद सदस्याचे विद्यापीठाला पत्र

एज्युवार्ता न्यूज नेटवर्क 

सावित्रीबाई फुले पुणे विद्यापीठातील (Savitribai Phule Pune University) विविध विद्याशाखांसाठी परीक्षेचे कामकाज करणाऱ्या प्राध्यापकांच्या मानधनाचे दर निश्चित करावेत, अशी मागणी विद्यापीठाच्या विद्या परिषदेचे सदस्य डॉ.शिवाजी टाकळकर (Dr. Shivaji Takalkar, Member of Vidya Parishad) यांनी केली आहे. राष्ट्रीय शैक्षणिक धोरणाच्या (National Education Policy)अंमलबजावणीनंतर विद्यापीठाने मानधनाचे नवीन दरपत्रक प्रसिद्ध करावे, असे निवेदन टाकळकर यांनी विद्यापीठाच्या परीक्षा व मूल्यमापन मंडळाच्या संचालक डॉ. महेश काकडे (Director of Examination and Evaluation Board Dr.Mahesh Kakade) दिले आहे.त्यामुळे विद्यापीठ या मानधन वाढीबाबत काय निर्णय घेणार हे पाहणे उत्सुकतेचे होणार आहे.

 
विद्यापीठाशी संलग्न महाविद्यालयांमध्ये 2024-25 या शैक्षणिक वर्षांपासून राष्ट्रीय शैक्षणिक धोरण लागू करण्यात आले. बदललेल्या अभ्यासक्रमानुसार विद्यापीठातील व संलग्न महाविद्यालयातील प्राध्यापकांना परीक्षेच्या कामकाजच्या मानधनात वाढ मिळावी, यासाठी गेल्या काही महिन्यांपासून विविध स्तरावर पाठपुरावा केला जात आहे. त्यात आता विद्यापीठाच्या अधिकार मंडळातील सदस्यांनी मानधन वाढीची मागणी केली आहे. 

विद्यापीठ प्रशासनाने विविध विद्याशाखांमध्ये मानधनासाठी सुस्पष्ट व लिखित स्वरूपामध्ये विद्यापीठाने परिपत्रक प्रसिद्ध केल्यास सर्व महाविद्यालय पातळीवर समन्वय दिसून येईल. त्यामुळे विद्यापीठाचे कुलगुरू, प्र-कुलगुरू , परीक्षा व मूल्यमापन मंडळ संचालक आदी अधिकारी व अधिकार मंडळातील सदस्यांनी परीक्षेच्या कामकाजाचा आढावा घेऊन नवीन दर पत्रक प्रसिद्ध करावे व महाविद्यालय पातळीवर शिक्षक व शिक्षकेतर कर्मचारी यांच्या कामकाजाचा सखोल आढावा घेऊन वाढीव शुल्क,  वाढती महागाई ,व वाढीव कामकाज लक्षात घेऊन मानधनात सुधारणा करावी, असे निवेदनात नमूद करण्यात आले आहे.