PRN Block : पीआरएन ब्लॉक केलेल्या विद्यार्थ्यांचे काय होणार?
पुणे, अहमदनगर व नाशिक जिल्ह्यात किती विद्यार्थी पीआरएन क्रमांक ब्लॉक झाल्यामुळे परीक्षा देऊ शकणार नाहीत, अशा विद्यार्थ्यांची आकडेवारी जमा करण्याचे काम सुरू आहे.
eduvarta@gmail.com 
एज्युवार्ता न्यूज नेटवर्क
विद्यापीठ अनुदान आयोगाच्या (University Grants Commission)नियमावलीप्रमाणे परीक्षा देण्यासाठी निश्चित करण्यात आलेला सत्र पूर्तता कालावधी (Session Completion Period)संपुष्टात आल्यानंतर सावित्रीबाई फुले पुणे विद्यापीठाने (Savitribai Phule Pune University)अनेक विद्यार्थ्यांचे पीआरएन क्रमांक ब्लॉक केले आहेत. त्यामुळे विद्यार्थी वर्गात संभ्रमाचे वातावरण निर्माण झाले आहे. मात्र, पुणे, अहमदनगर व नाशिक जिल्ह्यात किती विद्यार्थी पीआरएन क्रमांक ब्लॉक (Student PRN Number Block)झाल्यामुळे परीक्षा देऊ शकणार नाहीत, अशा विद्यार्थ्यांची आकडेवारी जमा करण्याचे काम सुरू आहे. त्यामुळे या विद्यार्थ्यांबाबत विद्यापीठ प्रशासन सकारात्मक असल्याचे दिसून येत आहे.
मागील वर्षी PRN ब्लॉक झाल्यामुळे परीक्षेपासून वंचित राहणाऱ्या विद्यार्थ्यांच्याबाबत विद्यापीठाच्या अधिकार मंडळात चर्चा करून तसेच विद्यापीठ अनुदान आयोगाकडून मान्यता घेऊन सावित्रीबाई फुले पुणे विद्यापीठाने PRN ब्लॉक केलेल्या विद्यार्थ्यांना परीक्षेच्या दोन संधी उपलब्ध करून दिल्या होत्या. सुमारे सव्वा लाखाहून अधिक विद्यार्थी पीआरएन ब्लॉक झाल्यामुळे परीक्षेपासून वंचित राहणार होते. त्यातील सुमारे 86 हजार विद्यार्थ्यांना परीक्षेची संधी देण्यात आली.या विद्यार्थ्यांमधील सुमारे 34 ते 36 हजार विद्यार्थी परीक्षेच्या दोन संधीमध्ये सर्व विषयात उत्तीर्ण झाले. त्यामुळे या विद्यार्थ्यांना पदवी प्राप्त झाली आहे. परिणामी या विद्यार्थ्यांचे शैक्षणिक नुकसान टळले आहे.
पदवी अभ्यासक्रमात प्रवेश घेतलेल्या विद्यार्थ्यांना मर्यादित कालावधीमध्ये परीक्षा देऊन पदवी उत्तीर्ण होणे बंधनकारक आहे. मात्र, दिलेल्या सत्रामध्ये अनेक विद्यार्थी उत्तीर्ण होऊ शकले नाहीत. त्यामुळे अशा विद्यार्थ्यांचे पीआरएन क्रमांक ब्लॉक केले आहेत. त्यामुळे या विद्यार्थ्यांना पुढील परीक्षेचे अर्ज भरता येत नाहीत. अशा विद्यार्थ्यांची माहिती महाविद्यालय स्तरावरून जमा केली जात आहे. या विद्यार्थ्यांची माहिती जमा झाल्यानंतर विद्यापीठ अनुदान आयोगाशी पत्रव्यवहार करून या विद्यार्थ्यांना पुन्हा परीक्षेची संधी देता येऊ शकते का? याबाबत विचारणा केली जाणार आहे. यूजीसीने मान्यता दिल्यास या विद्यार्थ्यांची परीक्षा घेता येईल. परंतु, युजेसीने नकार दिल्यास या विद्यार्थ्यांची परीक्षा घेता येणार नाही, असे विद्यापीठातील वरिष्ठ अधिकाऱ्यांनी सांगितले.
