वैद्यकीय पदव्युत्तर अभ्यासाक्रमाच्या प्रवेश परीक्षांचे वेळापत्रक जाहीर, १ सप्टेंबरला होणार परीक्षा

एज्युवार्ता न्यूज नेटवर्क 

शैक्षणिक वर्ष २०२४-२५ (Academic year 2024-25) साठी राज्य सामाईक प्रवेश परीक्षा कक्षातर्फे (CET Cell) विविध अभ्यासक्रमाच्या प्रवेश प्रक्रियेला सुरूवात झाली आहे. त्यापाठोपाठ आता पाच पदव्युत्तर वैद्यकीय अभ्यासक्रमांच्या (Post Graduate Medical Course) प्रवेश परीक्षेचे वेळापत्रक सीईटी सेलकडून जाहीर (Entrance exam schedule announced) करण्यात आले आहे. या अभ्यासक्रमांची सीईटी १ सप्टेंबर रोजी होणार असून, यासाठी २३ ऑगस्टपर्यंत विद्यार्थ्यांना नोंदणी करता येणार आहे. 

सीईटी सेलकडून, फिजिओथेरपी, ॲक्युपेशनल थेरपी, प्रोस्थेटिक ॲण्ड ऑर्थो, स्पीच ॲण्ड लॅग्वेज पॅथोलॉजी, ऑडियोलॉजी या पाच पदव्युत्तर अभ्यासक्रमांची प्रवेश प्रक्रिया  राबवण्यात येणार आहे. या अभ्यासक्रमांच्या प्रवेश परीक्षेचे वेळापत्रक सीईटी सेलचे अधिकृत संकेतस्थळ http://www.mahacet.org वर जाहीर करण्यात आले आहे. त्यानुसार या अभ्यासक्रमांच्या परीक्षेसाठी विद्यार्थ्यांना २३ ऑगस्ट रोजी सायंकाळी ११ वाजून ५९ मिनिटांपर्यंत विद्यार्थ्यांना सीईटीच्या संकेतस्थळावरून अर्ज व परीक्षा शुल्क भरायचे आहे. 

अर्ज भरलेल्या विद्यार्थ्यांचे २८ ऑगस्ट रोजी संकेतस्थळावर प्रवेशपत्र उपलब्ध होईल. या पाचही अभ्यासक्रमाची परीक्षा १ सप्टेंबर रोजी सकाळी ११ ते दुपारी १२:३० या वेळेत होणार आहे. त्यासाठी  विद्यार्थ्यांना  सकाळी ९ ते १०:३० या वेळेत परीक्षा केंद्रावर प्रवेश दिला जाणार आहे. १०:३० च्या नंतर विद्यार्थ्यांना प्रवेश नाकारला जाईल. पदव्युत्तर अभ्यासक्रमांच्या प्रवेशासाठी पात्रता निकष आणि सामायिक प्रवेश परीक्षेसंदर्भातील माहिती पुस्तिका http://www.mahacet.org च्या सीईटी कक्षाच्या संकेतस्थळावर उपलब्ध करून देण्यात येणार आहे. तसेच ही परीक्षा देण्यासाठी विद्यार्थ्यांने महाराष्ट्रातील महाविद्यालयातून पदवी परीक्षा उत्तीर्ण होणे आवश्यक आहे.