शुल्काची माहिती सूचना फलकावर प्रसिद्ध करा; अन्यथा कारवाई

एज्युवार्ता न्यूज नेटवर्क 

सवित्रीबाई फुले पुणे विद्यापीठाशी (Savitribai Phule Pune University) संलग्न महाविद्यालयांनी (Affiliated College) विद्यापीठ शुल्क नियामक प्राधिकरणाने (University Fee Regulatory Authority) ठरविलेले अभ्याक्रमनिहाय शुल्क आपल्या महाविद्याल्याच्या संकेतस्थळावर तसेच सूचना फलकावर प्रसिध्द (Course wise fee display on college website and notice board) करावे. तसेच मागासवर्गीय विद्यार्थ्यांकडून शुल्क आकारत असल्याबाबत किंवा जादा शुल्क आकारल्याबाबत तक्रार प्राप्त झाल्यास नियमानुसार संबंधित महाविद्यालयावर कडक कारवाई करण्यात येईल, असा इशारा विद्यापीठ प्रशासनाने परिपत्रकाद्वारे दिला आहे. 

सावित्रिबाई फुले पुणे विद्यापीठाशी संलग्नित महाविद्यालये व मान्यताप्राप्त शैक्षणिक परिसंस्थामध्ये शिक्षण घेणाऱ्या अनुसूचित जाती, अनुसूचित जमाती, विमुक्त जाती/भटक्या जमाती व विशेष मागास प्रवर्ग, आर्थिक दुर्बल घटक, सामाजिक व शैक्षणिकदृष्ट्या मागासवर्ग तसेच इतर मागास प्रवर्गातील विद्यार्थी विविध अभ्यासक्रमासाठी प्रवेश घेतात. या घटकातील पात्र विद्यार्थ्यांना विहित अभ्यासक्रमासाठी शासनामार्फत MAHADBT Portal वर दिल्या जाणाऱ्या शिष्यवृत्तीसाठी अर्ज करतात अशा विद्यार्थ्यांची शासनाकडून शैक्षणिक शुल्क, परीक्षा शुल्क व इतर शुल्काची प्रतिपुर्ती करण्यात येते. 

शिष्यवृत्ती करिता पात्र असणाऱ्या विद्यार्थ्यांकडून शुल्क आकारण्यात येवू नये, तसे यापूर्वीच महाविद्यालयांना विद्यापीठाकडून निर्देश देण्यात आलेले आहेत. तरीही बरीच महाविद्यालये विद्यार्थ्यांकडून शुल्क आकारत असल्याच्या किंवा जादा शुल्क घेत असल्याबाबत विद्यार्थी आणि विद्यार्थी संघटना यांच्याकडून विद्यापीठ कार्यालयास तक्रारी प्राप्त झाल्या आहेत. त्यामुळे महाराष्ट्र सार्वजनिक विद्यापीठ अधिनियम २०१६ कलम १०१ अन्वये गठित केलेल्या समितीने विविध अभ्यासक्रमाचे शुल्क निश्चित केले आहेत. सदरचे शुल्क विद्यापीठाच्या संकेत स्थळावर प्रसिध्द करण्यात आलेले आहे. तसेच व्यावसायिक अभ्यासक्रमाचे शुल्क हे शुल्क नियामक प्राधिकरण (FRA) कडून निश्चित केले जाते. त्यामुळे सर्व शुल्काची माहिती महाविद्यालयांनी संकेतस्थळ आणि सूचना फलकावर प्रसिद्ध करावी , अन्यथा कडक कारवाई करण्यात येईल असा निर्वाणीचा इशारा विद्यापीठाने संलग्न महाविद्यालयांना दिला आहे.