NIRF रँकिंग कशामुळे घसरले; विद्यापीठाने केला खुलासा 

एज्युवार्ता न्यूज नेटवर्क 

नॅशनल इन्स्टिट्यूशनल रँकिंग फ्रेमवर्क अर्थात NIRF रँकिंगमध्ये यंदा सावित्रीबाई फुले पुणे विद्यापीठाची मोठी घसरण झाली. मात्र ,ही घसरण विद्यापीठाकडे प्राध्यापक उपलब्ध नसल्यामुळे झाली असल्याचा खुलासा विद्यापीठ प्रशासनतर्फे करण्यात आला आहे. गेल्या दोन वर्षात अनेक ज्येष्ठ प्राध्यापक सेवानिवृत्त झाले. तसेच विद्यार्थी-शिक्षक यांचे प्रमाण कमी झाले. त्याचप्रमाणे अनेक प्राध्यापक सेवानिवृत्त झाल्यामुळे संशोधनातील योगदानही कमी झाले.परिणामी विद्यापीठ संशोधनामध्ये सुद्धा कमी पडले. त्यामुळे विद्यापीठाचे रँकिंग घसरले,असेही विद्यापीठातर्फे कळविण्यात आले आहे. 

NIRF रँकिंगच्या क्रमवारीत ओव्हर ऑलरँकिंगमध्ये सावित्रीबाई फुले पुणे विद्यापीठ 91 क्रमांकवर आहे. तर युनिव्हर्सिटी रँकिंग मध्ये 56 व्या क्रमांकावर आणि स्टेट युनिव्हर्सिटी रँकिंगमध्ये 11 व्या क्रमांकावर आहे. मात्र, या रॅंकिंगमध्ये निश्चितच सुधारणा केली जाईल, त्यासाठी विद्यापीठ काटिबद्ध आहे. राष्ट्रीय शैक्षणिक धोरणानुसार सुरू करण्यात आलेल्या नवीन अभ्यासक्रमांमुळे विद्यार्थ्यांची संख्या वाढली आहे, ज्यामुळे FSR वर आणखी ताण आला आहे. तसेच, निवृत्त झालेले प्राध्यापक हे उत्कृष्ट संशोधक असल्यामुळे, त्यांच्या निवृत्तीमुळे विद्यापीठाच्या संशोधन प्रकाशनांच्या संख्येत घट झाली, ज्याचा परिणाम NIRF रँकिंगवर दिसून आला आहे.

या आव्हानांवर मात करण्यासाठी SPPU ने सकारात्मक पावले उचलली आहेत. प्राध्यापक भरती प्रक्रिया सध्या सुरू आहे. ही प्रक्रिया पूर्ण झाल्यानंतर, विद्यापीठाचे विद्यार्थी-शिक्षक यांचे प्रमाण आणि संशोधन क्षेत्रातील योगदान निश्चित सुधारेल, अशी अपेक्षा आहे. या व्यतिरिक्त, SPPU ने संशोधनावर आणि एकूण सर्व बाबींवर लक्ष केंद्रित करणार असल्याचे विद्यापीठाने म्हटले आहे.