मराठवाड्यातील तरुणांना नोकरीची सुवर्ण संधी; नांदेड विद्यापीठात  'मेगा जॅब फेअर'

एज्युवार्ता न्यूज नेटवर्क 

 बजाज, अमेझॉन, गोदरेज यांसारख्या तब्बल २२ ते २३ नामांकित कंपन्यांमध्ये ४ हजार ५०० पेक्षा अधिक जागांसाठी नोकरीची संधी उपलब्ध करून देण्यात आली आहे. खास मराठवाड्यातील तरुणांसाठी ही संधी उपलब्ध करून देण्यात आली आहे. स्वामी रामानंद तीर्थ नांदेड विद्यापीठात (Swami Ramanand Teerth Nanded University) येत्या १३ सप्टेंबर रोजी सकाळी १० ते सायंकाळी ४ या वेळेत 'मेगा जॉब फेअर'चे (Mega Job Fair 2025) आयोजन करण्यात आले आहे. नांदेड जिल्ह्यासह मराठवाड्यातील सर्व बेरोजगार तरुणांनी या सुवर्णसंधीचा फायदा घ्यावा, असे आवाहन करण्यात आले आहे.

स्वामी रामानंद तीर्थ मराठवाडा विद्यापीठ नांदेड आणि पुण्यातील ॲसपायर नॉलेज ॲण्ड स्किल्स इंडिया प्रायव्हेट लिमिटेड यांच्या संयुक्त विद्यामाने 'मेगा जॉब फेअर'चे आयोजन करण्यात आले आहे. विद्यापीठाचे कुलगुरू डॉ. मनोहर चासकर, प्र- कुलगरू डॉ. अशोक महाजन आणि ॲसपायर नॉलेज ॲण्ड स्किल्स इंडियाचे संजय गांधी यांच्या पुढाकारातून हा  “मेगा जॉब फेअर होत आहे. 

ॲसपायर नॉलेज ॲण्ड स्किल्स इंडियाचे संजय गांधी म्हणाले, या मेगा जॉब फेअरमध्ये अमेझॉन, बजाज, गोदरेज, अरेस सॉफ्टवेअर, नेटविन इन्फोसोलुशन्स, टीम लिस डीजीटल, क्युस्ट क्रोप, पॉंईटमॅट्रीक्स, जेबीएल, विनजीट टेक्नोलॉजीस यांसारख्या नामांकित कंपन्यांसह अनेक उद्योग सहभागी होणार आहेत. या सुवर्ण संधीचा फायदा मराठवाड्यातील सुशिक्षित बेरोजगार तरुणांना घेता येणार आहे.

दहावी, बारावी, आयटीआय, डिप्लोमा, पदवीधर व पदव्युत्तर अशा सर्व स्तरावरील उमेदवारांसाठी ही नोकरीची संधी उपलब्ध आहेत. जॉब फेअरमध्ये सहभागी होण्याकरिता उमेदवारांनी https://bit.ly/NANDEDJF या लिंकवर नोंदणी करणे आवश्यक आहे. त्यानंतर कागदपत्रांची तपासणी होऊन प्रत्यक्ष मुलाखती पार पडणार आहेत. निवड झालेल्या उमेदवारांची अंतिम यादी त्यानंतर जाहीर केली जाईल. इच्छुक उमेदवारांनी आपला बायोडेटा, शैक्षणिक कागदपत्रे व ओळखपत्र घेऊन या जॉब फियरसाठी उपस्थित राहावे. या मेगा जॉब फेअरमुळे परिसरातील तरुणांना नामांकित कंपन्यांमध्ये करिअर घडविण्याची सुवर्णसंधी उपलब्ध होणार असल्याचे मत संजय गांधी यांनी व्यक्त केले आहे.