MPSC कडून दिव्यांग उमेदवारांच्या कागदपत्रांची २९ जुलै रोजी पडताळणी

एज्युवार्ता न्यूज नेटवर्क 

पूजा खेडकर (Pooja Khedkar)प्रकरणानंतर दिव्यांग प्रमाणपत्राच्या (disabled candidates )संदर्भात उमेदवाराच्या कागदपत्रांची काटेकोर तपासणी करण्यास सुरुवात झाली आहे. महाराष्ट्र लोकसेवा आयोगाने (Maharashtra Public Service Commission) 20 मार्च 2024 रोजी राज्यसेवा मुख्य परीक्षा 2022 ची तातपूर्ती निवड यादी प्रसिध्द केली आहे. या यादीमधील काही उमेदवारांना त्यांच्या कागदपत्राच्या तपासणीसाठी 29 जुलै रोजी उपस्थित राहण्याचे आदेश आयोगाने दिले आहेत.

एमपीएससीने प्रसिद्ध केलेल्या परिपत्रकानुसार संबंधित उमेदवारांनी 29 जुलै रोजी सकाळी 11 वाजता दिव्यांग प्रमाणपत्राच्या पडताळणीसाठी संबंधित अपिलीय प्राधिकरण यांच्याकडे उपस्थित राहणे आवश्यक आहे. उमेदवारांनी त्यांचे आवश्यक कागदपत्र बरोबर घेऊन येणे गरजेचे आहे. संबंधित उमेदवारांनी दिलेल्या कालमर्यादेत दिव्यांग प्रमाणपत्र सादर न केल्यास उमेदवाराचे प्रमाणपत्र संशयास्पद असल्याचे एमपीएससीकडून गृहीत धरले जाईल. तसेच त्याची उमेदवारी ही प्रक्रियेतून रद्द करण्यात येईल,असे एमपीएससीने स्पष्ट केले आहे. 

एमपीएससीने प्रसिद्ध केलेल्या परिपत्रकानुसार नौकुडकर स्नेहल विलास, आदित्य अनिल बामणे, मरकड बाळू दिगंबर, मस्के श्रीराम कुबेरराव, कोकरे पुरुषोत्तम दादासो, जाधव सचिन वसंत, भोगटे मनोज मारुती, भारत किसन गंगावणे तसेच या उमेदवारांना प्रमाणपत्र पडताळणीसाठी उपस्थित राहण्याच्या सूचना देण्यात आल्या आहेत.या उमेदवारांना पुणे, ठाणे, नाशिक, कोल्हापूर, लातूर येथील सक्षम अधिकाऱ्यांनी प्रमाणपत्र वितरित केले आहे.