Breaking News :सेट परीक्षेसाठी मराठा आरक्षण लागू; निकाल पुढील आठवड्यात
राज्यस्तरीय पात्रता परीक्षेसाठी (सेट) 'सामाजिक व शैक्षणिक दृष्ट्या मागास संवर्गाकरिता अधिनियम 2024' मधील तरतुदीनुसार एसईबीसी आरक्षण लागू करण्यात आले आहे.
eduvarta@gmail.com 
एज्यवार्ता न्यूज नेटवर्क
SET EXAM RESULT NEWS : महाराष्ट्र व गोवा राज्यातील (Maharashtra and Goa) वरिष्ठ महाविद्यालयात सहाय्यक प्राध्यापक पदाच्या पात्रतेसाठी सावित्रीबाई फुले पुणे विद्यापीठातील (Savitribai Phule Pune University) सेट विभागातर्फे (Set department)घेतल्या जाणाऱ्या राज्यस्तरीय पात्रता परीक्षेसाठी (सेट- SET) 'सामाजिक व शैक्षणिक दृष्ट्या मागास संवर्गाकरिता अधिनियम 2024' मधील तरतुदीनुसार एसईबीसी आरक्षण (SEBC reservation)लागू करण्यात आले आहे. त्यामुळे सेट परीक्षेचा रखडलेला निकाल लवकरच जाहीर केला जाणार आहे, या वृत्तास विद्यापीठाच्या अधिकाऱ्यांनी दुजोरा दिला आहे.
सावित्रीबाई फुले पुणे विद्यापीठाच्या सेट विभागातर्फे 7 एप्रिल 2024 रोजी आयोजित करण्यात आलेल्या सेट परीक्षेसाठी मराठा आरक्षण लागू करावे, अशी मागणी काही विद्यार्थ्यांनी विद्यापीठाकडे केली होती. त्यावर विद्यापीठाने राज्य शासनाकडे अभिप्राय मागवला होता. गेल्या काही महिन्यांपासून राज्य शासनाकडून त्यावर उत्तर प्राप्त होत नव्हते, अखेर राज्य शासनाने यावर निर्णय दिला आहे. त्यामुळे सेट परीक्षेचा निकाल जाहीर होण्याचा मार्ग मोकळा झाला आहे.
सेट परीक्षेच्या निकालासाठी मराठा आरक्षण लागू करण्यात आले असले तरी मुंबई उच्च न्यायालयात दाखल करण्यात आलेल्या रीट याचिका व भविष्यातील इतर निर्णयाच्या आधीन राहून एसईबीसी प्रवर्गातील विद्यार्थ्यांसाठी आरक्षण निश्चित करून निकाल जाहीर केला जाणार आहे, असे मंत्रालयातील सूत्रांनी सांगितले.
सेट परीक्षेच्या निकालासाठी एसईबीसी आरक्षण लागू करण्याची वेळ आली तर विद्यापीठाकडे त्याबाबतचा उपलब्ध डेटा असाव, या दृष्टिकोनातून विद्यापीठाने एसईबीसी आरक्षणाचा लाभ घेऊ इच्छिणाऱ्या विद्यार्थ्यांकडून अर्ज मागविले होते. 19 जुलै ते 25 जुलै या कालावधीपर्यंत अर्ज भरण्यास मुदत देण्यात आली होती. परंतु, महाराष्ट्रातील विविध ठिकाणी अतिवृष्टीमुळे व काही विद्यार्थ्यांना मुदतीत अर्ज भरणे शक्य न झाल्यामुळे विद्यापीठाच्या सेट विभागाने 27 व 28 जुलै रोजी सायंकाळी 6 वाजेपर्यंत या संदर्भातील अर्ज भरण्यासाठी मदत वाढ दिली आहे.
-----------------
सेट परीक्षेचा निकाल जाहीर करण्यासाठी एसईबीसी आरक्षण लागू करण्याच्या निर्णयाला मंजुरी देण्यात आली आहे, या वृत्तास सावित्रीबाई फुले पुणे विद्यापीठाचे प्रभारी कलसचिव व सेट विभागाचे प्रमुख पदाधिकारी डॉ. विजय खरे यांनी दुजोरा दिला आहे.ते म्हणाले, सेट विभागाचा निकाल जाहीर करण्यापूर्वी इच्छुक उमेदवारांकडून एसईबीसी संवर्गाचा अर्ज भरून घेण्यासाठी मुदत देण्यात आली होती. ही मुदत आणखी दोन दिवस वाढविण्यात आले आहे. उमेदवारांकडून अर्ज प्राप्त झाल्यानंतर पुढील दोन दिवस त्यावर आवश्यक कार्यवाही करून लवकरच निकाल जाहीर केला जाईल.
