MBBS चे तीन विद्यार्थी बुडाले, अंघोळीसाठी गेले अन् घात झाला

एज्युवार्ता न्यूज नेटवर्क

गडचिरोली येथील शासकीय वैद्यकीय महाविद्यालयात (Government Medical College Gadchiroli) शिक्षण घेणारे एमबीबीएस चे शिक्षण घेणारे तीन मित्र बुडाल्याची (3 MBBS students drown to death) धक्कादायक घटना समोर आली आहे. हे तीन मित्र एमबीबीएस च्या प्रथम वर्षात शिक्षण घेत होते. विदर्भात असलेल्या उन्हाच्या उखाड्यामुळे वैनगंगा नदीत पोहायला म्हणून गेले आणि काळाने त्यांच्यावर घाला घातला. यामध्ये तीन विद्यार्थ्यांचा मृत्यू (Three students died) झाल्याचे समोर आले आहे. 

मिळालेल्या सविस्तर माहितीनुसार, गोपाळ गणेश साखरे (२०, रा. चिखली, बुलढाणा), पार्थ बाळासाहेब जाधव (२०, रा. शिर्डी, जि. अहिल्यानगर) आणि स्वप्नील उद्धवसिंग शिरे (२०, रा. संभाजीनगर), अशी विद्यार्थ्यांची नावे आहेत. ही घटना आज, शनिवारी सायंकाळी घडली. तिघांचाही शोध सुरू आहे. 

शासकीय सुटी असल्याने चंद्रपूर-गडचिरोली सीमेवरील व्याहाड खुर्द येथे पुलाखालील वैनगंगा नदीच्या पात्रात गडचिरोली शासकीय वैद्यकीय महाविद्यालयातील आठ विद्यार्थी अंघोळीसाठी गेले होते. सर्वच विद्यार्थी अंघोळीसाठी नदीपात्रात उतरले. मात्र, पाण्याचा अंदाज न आल्याने गोपाळ, पार्थ आणि स्वप्नील हे तिघे बुडाले, तर पाच विद्यार्थी बुडण्याच्या भितीने पाण्याच्या बाहेर आले. बुडणाऱ्या विद्यार्थ्यांना वाचविण्याचा प्रयत्न करण्यात आला. मात्र ते नदीपात्रात दूरवर वाहून गेल्याने त्यांना वाचवण्यात यश आले नाही.

सध्या उन्हाळा असल्याने नदीचे पात्र कोरडे दिसत असले तरी काही ठिकाणी खोल पाणी आहे. या विद्यार्थ्यांची तिथेच चूक झाली, असे सांगितले जात आहे. माहिती मिळताच सावली पोलीस ठाण्याचे ठाणेदार प्रदीप पुलरवार पथकासह घटनास्थळी दाखल झाले. विद्यार्थ्यांचा शोध सुरू करण्यात आला. मात्र, अंधार पडल्याने शोधकार्य थांबविण्यात आले. रविवारी सकाळी पुन्हा शोधकार्य सुरू करण्यात येणार आहे.