विद्यार्थ्यांना मराठी विषय घेऊ न देणाऱ्या कॉलेजची भूमिका संशयास्पद; विद्यापीठाला अहवाल सादर 

एज्यवार्ता न्यूज नेटवर्क 

सावित्रीबाई फुले पुणे विद्यापीठाशी (Savitribai Phule Pune University)संलग्न महाविद्यालयामधील विद्यार्थ्यांना मराठी विषय (Marathi subject)घेऊ न देणाऱ्या शिक्रापूर येथील कस्तुरी संस्थेच्या महाविद्यालयाच्या चौकशीसाठी स्थापन करण्यात आलेल्या समितीने विद्यापीठाला नुकताच अहवाल सादर केला आहे. त्यात या घटनेत महाविद्यालयाची भूमिका संशयास्पद असल्याचे निरीक्षण चौकशी समितीने (inquiry committee)नोंदविले आहे.मात्र, महाविद्यालयाविरोधात कोणत्याही कारवाईची शिफारस केलेली नाही.तसेच विद्यापीठाने नियुक्ती केलेल्या समितीच्या सर्व सदस्यांनी संबंधित महाविद्यालयाला भेट न देताच अहवाल सादर केला असून हा अहवालच संशयास्पद असल्याचा आरोप युवासेनेचे सह-सचिव कल्पेश यादव यांनी केला आहे.

सावित्रीबाई फुले पुणे विद्यापीठाशी संलग्न महाविद्यालयाने मराठी विषय घेऊ न दिल्याने या महाविद्यालयाविरोधात विद्यार्थ्यांनी विद्यापीठाकडे तक्रार केली होती. त्यावर विद्यापीठ प्रशासनाने या प्रकरणाची चौकशी करण्यासाठी समिती स्थापन केली होती. समितीतील काही सदस्यांनी प्रत्यक्ष महाविद्यालयाला भेट देऊन वस्तुनिष्ठ अहवाल विद्यापीठाकडे सादर केला. विद्यापीठाकडे लेखी तक्रार करणाऱ्या विद्यार्थ्यांपैकी काही विद्यार्थ्यांनी आम्ही विद्यापीठाकडे तक्रारच केली नाही, असे सांगितले. मात्र, या संदर्भातील एक ऑडिओ क्लिप व्हायरल झाली होती. तसेच तक्रार करणाऱ्या विद्यार्थ्यांपैकी एका विद्यार्थ्याने पुन्हा एकदा विद्यापीठात येऊन तक्रार दिली असल्याचे बोलले जात आहे. दरम्यान, युवा सेनेचे सहसचिव कल्पेश यादव यांनी दोन दिवसांपूर्वी विद्यापीठ प्रशासनाला याबाबत लेखी निवेदन दिले आहे. 

मराठीचा अवमान करणाऱ्या शिक्रापूर येथील कस्तुरी संस्थेच्या महाविद्यालयात विरोधात काही विद्यार्थ्यांनी तक्रार दिली होती. मराठी विषयाचा अवमान करणाऱ्या या महाविद्यालयाची संलग्नता रद्द करावी अशी मागणी कल्पेश यादव यांनी निवेदनाद्वारे विद्यापीठाकडे केली आहे. तसेच विद्यापीठाने स्थापन केलेल्या समितीकडून पारदर्शक अहवाल सादर व्हावा,अशी अपेक्षा होती. मात्र, चौकशी समितीमधील काही सदस्य या प्रक्रियेत सहभागीच झाले नाहीत. त्यामुळे समितीच्या कामकाजाबाबतच शंका निर्माण होते,असे विद्यापीठाला दिलेल्या निवेदनात नमूद करण्यात आले आहे.

 मराठी अभ्यास मंडळाचे अध्यक्ष संदीप सांगळे यांच्या अध्यक्षतेखाली विद्यापीठाने चौकशी समिती स्थापन केली होती. या समितीमध्ये विद्यापीठाच्या आंतरविद्याशाखीय अभ्यास विद्याशाखेचे प्रभारी अधिष्ठाता डॉ.प्रभाकर देसाई, विद्यापीठाच्या मराठी विभागाचे प्रमुख डॉ.तुकाराम रोंगटे, वाघोली बकोरी फाटा येथील भारतीय जैन संघटनेच्या कला, विज्ञान व वाणिज्य महाविद्यालयातील डॉ.रमेश गायकवाड, तसेच अहमदनगर जिल्ह्यातील अहमदनगर महाविद्यालयातील डॉ.सुधाकर शेलार यांचा या समावेश होता.मात्र, काही कारणांमुळे आंतरविद्याशाखीय अभ्यास विद्याशाखेचे प्रभारी अधिष्ठाता डॉ.प्रभाकर देसाई हे चौकशी समितीबरोबर संबंधित महाविद्यालयाला भेट देण्यासाठी जाऊ शकले नाही, असे विश्वसनीय सूत्रांनी सांगितले. 

मराठी भाषेला अभिजात भाषेचा दर्जा मिळाला आहे. तसेच सावित्रीबाई फुले पुणे विद्यापीठाची स्थापनाकहा मुळी मराठी भाषेच्या विकासासाठी झाली होती,असे असताना विद्यापीठाशी संलग्न एका महाविद्यालयाकडून विद्यार्थ्यांना मराठी विषय घेण्यापासून परावृत्त करणे चुकीचे आहे, अशी भूमिका अनेक मराठी भाषा प्रेमींनी व अभ्यासकांनी व्यक्त केली होती. त्यामुळे विद्यापीठाकडून स्थापन केलेल्या समितीकडून काय अहवाल दिला जाणार ? याबाबत उत्सुकता होती. समितीने दिलेल्या अहवालानुसार संबंधित शैक्षणिक संस्था व महाविद्यालयाची भूमिका संशयास्पद असल्याचे अहवालात नमूद करण्यात आले आहे, असेही सूत्रांनी सांगितले. 

---------------------------------------
 विद्यापीठाने स्थापना केलेल्या समितीतील सदस्यांनी कस्तुरी शिक्षण संस्थेच्या महाविद्यालयाला प्रत्यक्षात भेट दिली. सर्व बाबींची तपासणी करून समितीतील सदस्यांनी विद्यापीठाला या प्रकरणी वस्तुनिष्ठ अहवाल सादर केला आहे. 
- डॉ. संदीप सांगळे, अध्यक्ष, चौकशी समिती, सावित्रीबाई फुले पुणे विद्यापीठ, पुणे