10 वर्षात वैद्यकीय महाविद्यालयांची संख्या आणि जागा दुप्पट झाल्या; आरोग्यमंत्र्यांची लोकसभेत माहिती
गेल्या 10 वर्षांत देशातील वैद्यकीय महाविद्यालयांची संख्या 387 वरून 731 झाली आहे. याशिवाय देशातील वैद्यकीय पदवीपूर्व जागांची संख्याही ५१ हजार ३४८ वरून १ लाख १२ हजार झाली आहे.
eduvarta@gmail.com 
एज्युवार्ता न्यूज नेटवर्क
मागील 10 वर्षात म्हणजे 2014 ते 2024 या काळात देशातील वैद्यकीय महाविद्यालयांची (Medical College) संख्या जवळपास दुप्पट झाली (Double the number of medical colleges) असल्याची माहिती केंद्रीय आरोग्य मंत्री जेपी नड्डा (Health Minister JP Nadda) यांनी लोकसभेत दिली. ते म्हणाले, गेल्या 10 वर्षांत देशातील वैद्यकीय महाविद्यालयांची संख्या 387 वरून 731 झाली आहे. याशिवाय देशातील वैद्यकीय पदवीपूर्व जागांची संख्याही ५१ हजार ३४८ वरून १ लाख १२ हजार झाली आहे.
NDA सरकारच्या काळात UG च्या जागांमध्ये 118 टक्के आणि PG च्या जागांमध्ये 133 टक्के वाढ झाली आहे. 2024-25 साठी आरोग्य आणि कुटुंब कल्याण मंत्रालयाच्या अंतर्गत अनुदानाच्या मागण्यांवरील चर्चेदरम्यान मंत्री म्हणाले, 'देशात 2014 पर्यंत 387 वैद्यकीय महाविद्यालये होती. आता ही संख्या 731 वर पोहोचली आहे. याव्यतिरिक्त, UG वैद्यकीय जागा देखील 51 हजार 348 वरून 1 लाख 12 हजारांपर्यंत वाढल्या आहेत. हे प्रमाण 118 टक्के वाढ दर्शविते, तर PG जागांमध्ये 133 टक्के वाढ झाली आहे.
आरोग्य मंत्री म्हणाले, '2013-14 मध्ये आरोग्य बजेट 33 हजार 278 कोटी रुपये होते. आज ते बजेट 90 हजार 958 कोटी रुपये झाले आहे. पहिल्या एनडीए सरकारच्या (अटलबिहारी वाजपेयी सरकार) आधी देशात एकच एम्स होती. अटलबिहारी वाजपेयी यांच्या नेतृत्वाखालील सरकारच्या काळात सहा एम्स उघडण्यात आल्या. पंतप्रधान नरेंद्र मोदी यांच्या सरकारच्या गेल्या 10 वर्षात 22 एम्स मंजूर झाली आहेत. त्यापैकी 18 कार्यान्वित तर 4 बांधकामाधीन आहेत.
