विद्यार्थ्यांची कॅरी ऑन ची मागणी मान्य; हजारो विद्यार्थ्यांना लाभ

एज्युवार्ता न्यूज नेटवर्क 

शैक्षणिक वर्ष २०२४-२५ करीता उच्च व तंत्रशिक्षण विभागाच्या अखत्यारीतील सर्व अकृषी विद्यापीठांमध्ये विद्यार्थ्यांसाठी कॅरी ऑन सुविधा उपलब्ध करून देण्यात आली आहे. याबाबतचा शासन निर्णय प्रसिद्ध करण्यात आला आहे. त्यामुळे अनेक विद्यार्थ्यांचे शैक्षणिक नुकसान टाळणार आहे.

अभियांत्रिकी अभ्यासक्रमांशी संबंधित विद्यार्थ्यांना शैक्षणिक वर्ष २०२४-२५ मध्ये कॅरी ऑन सुविधा उपलब्ध करून देण्याच्या अनुषंगाने कार्यवाही करण्याबाबतची मागणी विद्यार्थी / विद्यार्थी संघटना / सिनेट सदस्य / लोकप्रतिनिधी यांचेकडून करण्यात आली आहे.

तंत्र शिक्षण संचालक यांनी कळविल्याप्रमाणे राज्यातील काही विद्यापीठांनी शैक्षणिक वर्ष २०२४-२५ करीता अभियांत्रिकी अभ्यासक्रमांशी संबंधित विद्यार्थ्यांना कॅरी ऑन सुविधा उपलब्ध करुन दिली आहे. तर काही विद्यापीठांनी अशी सुविधा उपलब्ध करुन दिलेली नाही. तथापि, अभियांत्रिकी अभ्यासक्रमांशी संबंधित विद्यार्थ्यांना कॅरी ऑन सुविधा उपलब्ध करुन देण्यासंदर्भात राज्यातील विविध विद्यापीठांमध्ये एकसमानता आणण्यासाठी अशा सर्व अकृषी विद्यापीठांना त्याबाबत निर्देश देण्याबाबत शासन स्थरावर विचार केला जात होता.

महाराष्ट्र सार्वजनिक विद्यापीठ अधिनियम, २०१६ मधील कलम ५ (८१) मधील अधिकारांचा वापर करून राज्यातील सार्वजनिक विद्यापीठांना तसेच, डॉ. बाबासाहेब आंबेडकर तंत्रशास्त्र विद्यापीठ, लोणेरे, रायगड, अधिनियम, २०१४ मधील कलम ९४ मधील तरतुदीनुसार त्या विद्यापीठास पुढील प्रमाणे निर्देश देण्यात येत आहेत.

१) प्रथम वर्षामध्ये अनुत्तीर्ण असणाऱ्या विद्यार्थ्यांना तृतीय वर्षाच्या ५ व्या सत्राकरिता, व्दितीय वर्षामध्ये अनुत्तीर्ण असणाऱ्या विद्यार्थ्यांना चतुर्थ वर्षाच्या ७ व्या सत्राकरिता तसेच वरील वर्गात प्रवेश देण्याची पात्रता ही सम सत्र २०२३-२४ (म्हणजे उन्हाळी परीक्षा २०२३-२४) च्या परीक्षांच्या निकाला ऐवजी विषम सत्र २०२४-२५ (म्हणजे हिवाळी परीक्षा २०२४-२५) च्या निकालांवर ठरवावी. अशा प्रकारे पात्र ठरलेल्या विद्यार्थ्याच्या शैक्षणिक वर्ष २०२४-२५ च्या विषम (हिवाळी) व सम (उन्हाळी) सत्राच्या परीक्षा एकत्रित सम (उन्हाळी सत्राच्या परीक्षांसोबत घेण्यात याव्यात.अशा प्रकारे वरील वर्गात प्रवेशासाठी पात्र ठरलेल्या विद्यार्थ्याचे विषम सत्राचे अभ्यासक्रम पूर्ण करण्याची जबाबदारी विद्यार्थ्यांची असेल आणि यासाठी विद्यार्थ्यांना महाविद्यालयाकडे आवश्यक हमीपत्र भरून द्यावे लागेल.

 ज्या विद्यापीठांनी शैक्षणिक वर्ष २०२४-२५ करिता carry on ची सुविधा त्यांच्या विद्यार्थ्यांना यापूर्वीच दिली असेल, अशा विद्यापीठांना सदर निर्देश लागू असणार नाहीत.सदर निर्देश अत्यंत अपवादात्मक परिस्थितीमध्ये केवळ शैक्षणिक वर्ष २०२४-२५ करिता लागू राहतील व या निर्देशांचा संदर्भ पुढील वर्षामध्ये घेता येणार नाही, असे अध्यादेशात नमूद केले आहे.