पुण्यातील नामांकित महाविद्यालयाच्या वसतिगृहात विद्यार्थी मृतावस्थेत

एज्युवार्ता न्यूज नेटवर्क

पुण्यातील नामांकित महाविद्यालयातील एक धक्कादायक बातमी समोर आली आहे. महाविद्यालयाच्या वसतिगृहातच एक विद्यार्थी मृतावस्थेत आढळला असून एकच खळबळ उडाली आहे. फर्ग्युसन कॉलेजमधील (Ferguson College) वसतिगृहात १९ वर्षीय कायद्याचा अभ्यास करणारा विद्यार्थी मृतावस्थेत आढळला (Law student found dead) असून भूषण डोमाने (bhushan domane) असे मृत विद्यार्थ्याचे नाव आहे. हा विद्यार्थी मूळचा महाराष्ट्रातील वर्धा जिल्ह्यातील (Wardha district of Maharashtra) रहिवासी असल्याची माहिती आहे.

भूषण फर्ग्युसन महाविद्यालयाच्या आवारातील डेक्कन एज्युकेशन सोसायटीच्या नवलमल फिरोदिया विधी महाविद्यालयात शिक्षण घेत होता. शुक्रवारी सकाळी महाविद्यालयाच्या आवारातील वसतिगृहात भूषण बेशुद्धावस्थेत पडल्याचे लक्षात आले. वसतिगृहातील विद्यार्थ्यांनी याबाबतची महिती महाविद्यालयीन प्रशासनाला दिली. त्याला तातडीने खासगी रुग्णालयात दाखल करण्यात आले मात्र, उपचारांपूर्वीच त्याचा मृत्यू झाल्याचे डॉक्टरांनी सांगितले. या घटनेची माहिती मिळताच डेक्कन पोलिसांनी घटनास्थळी धाव घेतली.

वसतीगृहाची खोली तपासात असताना पोलिसांना काही औषधाच्या गोळ्यांची पाकिटे सापडली आहे त्याचबरोबर डॉक्टरांच्या सल्ल्याची चिठ्ठी देखील सापडली आहे. भूषणचा मृतदेह शवविच्छेदनासाठी ससून रुग्णालयात पाठविण्यात आला आहे. शवविच्छेदन अहवालानंतर, मृत्यूमागचे निश्चित कारण समजेल. पोलिसांकडून भूषणच्या मित्रांची चौकशी करण्यात आली. याप्रकरणी डेक्कन पोलीस ठाण्यात अकस्मात मृत्यू अशी नोंद करण्यात आल्याची माहिती डेक्कन पोलीस ठाण्याच्या वरिष्ठ पोलीस निरीक्षक गिरीषा निंबाळकर यांनी दिली.