'शालार्थ आयडी घोटाळ्या'तील गुन्ह्यांची आता राज्यव्यापी चौकशी

एज्युवार्ता न्यूज नेटवर्क

शालेय शिक्षण विभागातील (School Education Department) शालार्थ आयडी घोटाळ्यात (School ID scam) नागपूर विभागात दाखल गुन्ह्यांची चौकशी करणाऱ्या विशेष तपास पथकाला आता राज्यभरातील गुन्ह्यांची चौकशी (Investigation of crimes across the state) करण्याचे अधिकार देण्यात आले आहेत. नागपूर शहरातील पोलिस उपायुक्त नित्यानंद झा (Deputy Commissioner of Police Nityanand Jha) हे या एसआयटीचे प्रमुख आहेत. शालार्थ घोटाळ्यात जिथे जिथे राज्यात गुन्हे दाखल झालेले आहेत तिथे तिथे चौकशी करण्याचे काम आता ही एसआयटी करेल. विशेष पोलिस महानिरीक्षक (कायदा व सुव्यवस्था) मनोज शर्मा यांनी अलिकडेच या संबंधीचा आदेश काढला आहे.

पोलीस दलातील १५ हजार पदे भरतीचा शासन निर्णय प्रसिद्ध

शालार्थ आयडी घोटाळ्याप्रकरणी चाळीसगाव येथे तीन गुन्हे नोंदविण्यात आले आहेत. स्थानिक पोलिस त्याची चौकशी करत आहेत. मात्र, नागपुरातील घोटाळ्यांची चौकशी करण्यासाठी तेथील पोलिस आयुक्तांनी नित्यानंद झा यांच्या अध्यक्षतेखाली एसआयटी नेमलेली होती. शालार्थ घोटाळ्याची व्याप्ती राज्यभर असल्याचे दिसून आले आहे.

या पार्श्वभूमीवर अशा सगळ्या गुन्ह्यांचा एकत्रितपणे आणि अधिक सुलभपणे तपास व्हावा यासाठी नित्यानंद झा प्रमुख असलेल्या एसआयटीला राज्यभरातील गुन्ह्यांचा तपास करण्याचे अधिकार देण्यात आले आहेत. आवश्यकतेनुसार एसआयटीमध्ये आणखी काही अधिकाऱ्यांचा समावेश करण्याचा अधिकार या एसआयटी पथकाला देण्यात आले आहेत.